हिट्लर सर्वाधिक खोजिएको, पढिएको अनि सुनिएको नाममध्य एक हो, यो पुस्ता र शताव्दीमा । अदम्य साहस, क्रुरता, आदर्श अनि आर्यहरुको एकतन्त्रीय राज हुनुपर्छ भन्ने नाराका साथ हिट्लर आफ्ना नाजी सेना र उल्टो स्वस्तिक चिह्नको साथमा विश्वविरुद्ध लड्न हिँडे । चाहना थियो, विश्व विजय गर्ने । तर त्यसो भएन, हिट्लर आफ्ना क्रुरता र एकपक्षिय सोचका कारण आफ्नैहरु बिच पनि अलोकप्रीय हुँदै गए । अन्तत बिभिन्न षडयन्त्र र घटनाक्रमका बिच हिट्लरले युद्ध हारे र ईतिहास उन्को बिरुद्धमा लेखियो । शायद उन्ले जितेका भए आज ईतिहास फरक हुनेथियो । जे सुकै होस् आज हामी संभावना र ईतिहासलाई जाडेर कुरा गरौं, यदि हिट्लरले दोश्रो विश्वयुद्ध जितेका भए के हुन्थ्यो भन्ने बारे ।

हिट्लरका २ मुख्य गल्ती भए, पहिलो सोभियत संघलाई आक्रमण गर्नु र दोश्रो अमेरिका विरुद्ध युद्ध घोषणा गर्नु, यिनै दुई कारणले हिट्लरको पतन गरायो । ७ दशक अघि सकिएको दोश्रो विश्वयुद्ध मानव ईतिहासले देखेको सर्वाधिक खर्चिलो र ठूलो नरसंहार हो जस्मा विश्वका हरेक कुनाका मान्छे र सेनाहरु ध्रुविकृत थिए ।

सन् १९३९ देखि १९४५ सम्मको यस युद्धमा ८ करोड मान्छेको मृत्यु भयो । द अलाइस भर्सेज द एक्सीस पावर नाम दिइएको यस युद्धमा जर्मन र समर्थकका जर्मन, ईटाली र जापान विरुद्ध बेलायत, अमेरिका र सोभियत यूनियन खडा भएका थिए । हिट्लरको शक्तिलाई एक्सीस मानियो र अन्तत अलाइजको जितका साथ हिट्लरले सन् १९४५ मा आत्महत्या गरे र युद्ध समापन भयो भन्ने कथन छ यद्धपि हिट्लरको मृत्युको कुनै पोख्ता प्रमाण भनें पाइएको छैन ।

सन् १९३९ मा जर्मनले पोल्याडलाई आक्रमण गर्नासाथै दोश्रो विश्वयुद्ध शुरु भएको हो, हिट्लर बेलायतको झैं विश्वमा आफ्नो अधिपत्य जमाउन चाहन्थे । शायद उनले दोश्रो विश्वयुद्ध जितेका भए आज विश्वमा जर्मनको अधिपत्य हुनेथियो । यसो हुँदा शक्तिशाली जर्मनले यूरोपका मुख्यतया पश्चिमी यूरोपका धेरै देशहरु आफूमा गाभ्ने थियो र आज हामीले सुनेका धेरै यूरोपेली देशहरुको नाम अस्तित्वमा हुने थिएनन ।

यूरोपको सर्वाधिक ठूलो देश जर्मन भएर केहि सोभियत यूनियनको भाग पनि शायद जर्मनमा अधिन हुनेथियो । हिट्लरले दोश्रो विश्वयुद्ध जितेको भए शायद अमेरिका र बेलायत जर्मनसंग संझौता गर्नेथिए र जर्मनलाई आफ्नो बाटो चल्न दिने थिए । यसो हुँदा आज भएका अनेकन ठूला कम्पनी र उत्पादनहरु जर्मन स्वामित्वमा रहने थियो र अमेरिकामा पनि धेरै जर्मन वर्चस्व रहने थियो ।

हिट्लरले विश्वभरिबाट यहुदीहरु निमिट्यान्न पार्दै विश्वबाट कम्यूनिष्टहरुको पनि नाम निशान मेटाउन चाहन्थे, उन्ले विश्वयुद्ध जितेको भए शायद यस्तै केहि गरिदिने पनि थिए । प्रथम विश्वयुद्ध जर्मनले हार्नुका कारण यहुदीहरु भएको मानेर हिट्लर यहुदीसंग धेरै घृणा गर्ने बताइन्छ । यदि यिनले विश्वयुद्ध जितेका भए आज ईज्रेलको अस्तित्व नै नहुने संभावना थियो । अमेरिकन फिक्शन लेखक फिलीप के डिकले सन् १९६२ मा बैकल्पिक ईतिहासका रुपमा हिट्लरले दोश्रो विश्वयुद्ध जितेका भए के हुनेथियो भनी पुस्तक लेखेका थिए, द म्यान इन द हाई क्यासलमा जर्मनले जितेको भए विश्वको मानचित्र कस्तो हुनेथियो भनी लेखिएको छ । हिट्लरलाई जित पछि विश्वको सर्वाधिक शक्तिशाली मान्छेका रुपमा पुज्न थालिने थियो भनी यस पुस्तकले वर्णन गर्दछ, आणविक हतियार र सेनामा विश्वको सर्वाधिक अधिपत्य हिट्लरको हुने पनि पुस्तकले देखाँउदछ ।

यता चिन सहित एसिया प्यासिफिकका अधिकतम भागहरुमा जापानको अधिपत्य हुनेथियो किनभनें सानो राज्य र सिमित साधनको उपलव्धताका कारणले जापान शदियौं देखि आफ्नो सिमा बिस्तारमा केन्द्रित थियो ।

हिट्लर धुम्रपान विरोधी र जनावर अधिकारका संरक्षक थिए तसर्थ उनले जितेका भए विश्वमा शाहाकारी खानकीको प्रर्वधन गरिँदै धुम्रपान पनि धेरै प्रतिबन्ध लगाइने संभावना पनि नकार्न सकिँदैन ।

तर सत्यता त यो हो कि दोश्रो विश्वयुद्धमा एक्सीस पावरले जितेन र माथिका तथ्यहरु केहि फिक्शन र केहि अनुमान हुन् । यि तथ्यहरुका बाहिर पनि थुप्रै कारणहरु हुनसक्थे जस्ले हिट्लरको हारजीतलाई निर्धारण गर्ने क्षमता राख्नेथिए तसर्थ ईतिहासको बिकल्प यसै कल्पना गर्न सकिन्न ।

बिभिन्न पुस्तक, ईतिहास खण्ड र बेवसाइट अध्ययनका आधारमा
सुयोग ढकाल