प्रदेश नम्वर १ का प्रमुख सोमनाथ अधिकारी ‘प्यासी’ आफ्नो जन्मथलो पोखरा १६ वाटुलेचौर आउनुभएको छ । प्रदेश प्रमुख भएपछि पहिलो पटक जन्मथलो आउनु भएका प्यासीलाई स्थानीयवासीले फुलमालाले स्वागत अनि खुसी सहितको सम्मान गरेका छन्

पोखरा १६ मा रहेका विभिन्न दलका नेता, कार्यकर्ता, सामाजिक व्यक्तिहरु, आमा समूह, क्लब, विभिन्न संघ संस्थाका प्रतिनिधि र स्थानीयबासीले प्यासीलाई सम्मान गरेका हुन् । उहाँको सम्मानमा स्थानीयहरु पञ्चेबाजाको टोली सहित निवासमै पुगेका थिए । प्यासीलाई स्वागत गर्न बालबालिकादेखि ८० वर्ष कटेका ज्येष्ठ नागरिक पनि सडकमा लामवद्घ भएका थिए । उनीहरुले प्यासीलाई प्रदेशको प्रमुख जस्तो गरिमामय पदमा पुगेकोमा बधाई दिदै पदको गरिमालाई थप उचो बनाउन आर्शिवाद समेत दिएका थिए ।