काठमाडौं मङ्सिर ११ गते । त्रिमूर्ति निकेतनले ‘सम र समका कृति’ मार्फत नाट्यसम्राट् बालकृष्ण समको महत्त्वपूर्ण दस्तावेज लेखनका साथै साढे सात दशकदेखि नेपाली भाषासाहित्यको सेवामा मन, वचन र कर्मले समर्पित भई अति विशिष्ट योगदान गरेबापत नेपाली साहित्यका महारथी प्रा.डा. तारानाथ शर्मा (तानासर्मा) लाई एक लाख रूपियाँ राशि सहित बालकृष्ण सम पुरस्कार समर्पण गर्ने निर्णय गरेको छ ।

आधुनिक कथा र उपन्यास सृजनाका माध्यमबाट नेपाली भाषा साहित्यलाई देशदेशान्तरमा पुर्याई लोकप्रिय तुल्याएवापत नेपाली साहित्यका विशिष्ट साधकद्वय श्रीमती गीता केशरी र पद्मावती सिंहलाई संयुक्त रूपमा ‘नेपाली साहित्य नारीरत्न’को सम्मान सहित पुरस्कार समर्पण गरिने निर्णय भएको छ । ताम्रपत्रका साथै यो पुरस्कारको राशि एक लाख रूपियाँ रहेको छ ।

शताब्दी पुरुष सत्यमोहन जोशीको उचाइ अभिवृद्धिका लागि समर्पित प्रसिद्ध कलाकार श्री राजन काफ्ले र समाजसेवी श्री श्रीगोपाल महर्जनलार्ई ‘सत्यमोहन जोशी शताब्दी पदक’ समर्पण गर्ने निर्णय भएको छ ।

त्रिमूर्ति निकेतनको भौतिक सम्हार र संरक्षणमा विशेष योगदान पुर्याएबापत श्री मोहनकृष्ण सापकोटा र श्री ढण्डुराज घिमिरेलाई ‘त्रिमूर्ति सेवा पदक’ समर्पण गर्ने निर्णय भएको छ ।

दस हजार रूपियाँ राशिसहित यस वर्षको ‘भद्र घले पदक’ विश्वनारी नेपाली साहित्य सम्मेलनका संयोजक प्रा.डा. गार्गी शर्मालार्ई समर्पण गरिएको छ । भद्र घले पदक त्रिमूर्ति निकेतनका पदाधिकारी र सदस्यलाई मात्र अर्पित गरिन्छ । भद्रकुमारी घलेका सम्मानमा स्थापित यो पदक यसअघि शताब्दी पुरूष डा.सत्यमोहन जोशी, खनुपरूदे रामबाबु प्रसाई, डा.मोदनाथ प्रश्रित, प्रा.ठाकुर पराजुली, के.के. कर्मचार्य, हरिहर विरही, सलोमी लेप्चाले ग्रहण गरिसक्नु भएको छ ।

त्रिमूर्ति निकेतनको सदस्यमा श्रीमती भगवती बस्नेत, श्री यादव भट्टराई र श्रीमती ललिता दोषी, मनोनीत हुनु भएको छ ।

त्रिमूर्ति निकेतनका संस्थापक तथा अध्यक्ष श्रीमती इन्दिरा प्रसाईको अध्यक्षतामा बसेको निकेतनको साधारण सभाले सो निर्णय गरेको हो ।

यसै गरी नइ प्रकाशनले पनि श्रीमती पुष्पा थापा र श्री तोयानाथ ओडारीलाई नइ प्रकाशनको सदस्यमा मनोनीत गरेको छ ।

(नरेन्द्रराज प्रसाई)
सदस्यसचिव
त्रिमूर्ति निकेतन