Lifestyle Portal
  •   ४ बैशाख २०७८, शनिबार

यो कस्तो हतार हो ?

१० पुष २०७५, मंगलवार २३:२६

Subash Bhandari

सम्बन्ध हतार हतारमा गासिन्छ । पढाई, करिअरलाई केही कुनामा राखेर हतार हतार सात फेरो लिइन्छ । सम्बन्धमा गासिएको केही समयमै सबैले हतार हतार आर्शिवाद दिन्छन सन्तानले डाडाकाडा ढाकुन, अर्को वर्ष अर्को मान्छे थपियोस सबै हतार हतारमा ।

समय पनि निकै हतारमा छ जस्तो लाग्छ, अनि हतार हतारमै जन्मन्छ कोहि । कोहीलाई भने हतार हतारमा जन्मने होकी भनेर हतार हतार गरी गर्भपतन गरिन्छ । किन यो हावालाई यति हतार आफनो गन्त्वयमा पुग्न, किन यो खोला यति सारो उर्लिएर आउछ समुन्द्रलाई भेटन, किन यो धर्ति हतार हतार चलीदिन्छ भुकम्प बनि । सबैलाई हतार  छ यहाँः

बच्चा हुर्कन नपाउँदै अभिभावकलाई स्कुल पठाउने हतार, अनी सानो सानो बाबु नानी हतार हतार गरी छिर्छन त्यो विद्यालयको गेटबाट । खासमा यो हतार चाही केको लागि हो, गन्तव्य कहाँ हो, अलि आरामसँग गए के रेल छुट्ने नै हो र ? हतार हतारमै उसले सिक्छ ‘क बाट कछुवा’ तर सिक्दैन कछुवाले कहिले हतार गरेन गन्तव्यमा पुग्न । परिवारमा कसैलाई कामको हतार, कसैलाई व्यवहारको हतार, घरधन्दाको हतार… सबै एउटा भब्य दौडमा भाग लिन अभ्यास गरे जस्तो जसमा दौड सुरुवातको सिठि त बज्छ तर दौड सकिएको सिठि बजेको हो या नसुनिएको हो थाहा नै हुँदैन ।

प्रविधिले मान्छेलार्इ मान्छे पुगेको हो अथवा के हो… परिवारिक गफ आजभोली पातलिएको छ । सामाजिक सञ्जालमा मेरा प्यारा, मेरा अादरणीय लेखिने भावहरु अनुहारसामू भावविहिन हुँदै गइसके । सबै अा आफनै रुटिनमा व्यस्त, शायद म पनि मेरो बुबा, ममीसँग फुर्सद निकालेर नबोलेको पनि धेरै नै भयो, आखिर कसको लागि यो हतार उहाँहरु नै त हो मेरो आफनो भन्ने उहाँहरुसँगै हतार हतारमा मैले खोज्न चैं के खोजीरहेको छु ? सारा संसार नै एकोहोरो ब्यस्त भएको सोही बाटोमा म’नी हिंडीरहेको छु । हतारमा छु, बाटोमा ठोकिदै हिंडछु तर रोकीएर सरी भनेर हिंड्न मलाई समय नै छैन । हतारीएकाहरुको भीडले टनाटन कोचाकच बस छ, मलाई हतार छ मलाई त्यही कोचिएको बसमा उभिन । पातलो मेरो ज्यान त्यही ठेलमठेलीमा कोच्चिन पाए ठूलो जीतको महसुुस गर्छु । अर्को केही खाली बस पनि आउँछ होला तर कुर्ने समय मसँग छैन । साँच्चै भन्या म हतारमा छु । लाइन बस्न कठिन लाग्छ, लाईन बसिञ्जेल म निकै कराउँछु यो सिस्टम भएन, कर्मचारी सुस्ता भए बुढा भए, भष्ट्राचार भयो यो भयो त्यो भयो जब म आफनो काम सक्छु अनि हतार हतार निस्कन्छु त्यो सिस्टम प्रतिको सोंच हतार हतारमैं सकिन्छ । भनिन्छ नी, “काम खत्तम किस्सा खत्तम” । केही समय सोंचेर त्यसलाई कसरी सुर्धान सकिन्छ म सोंच्न सक्दिन किनकी म हतारमा छु बरु अर्को पटक फेरी लाइनमा बस्छु अनि फेरी गाली गर्छु, त्यसैगरी । अनि हतार हतार दाँज्नेछु अन्य देशसँग आफनो देशलाई ।

बाटोमा जाम होस म आत्तिन्छु, सधै अरुलाई ओभरटेक गर्ने बानीको बिकाश गरेको छु , हो मलाई समयमै पुग्नु छ, तर कहाँ ?

सम्बन्ध पनि हतार हतारमा बनेका छन, अनी हतारमै तोडिएका छन । सामान्य विवादले पनि विकराल रुप लिएका छन, यहाँ फुर्सद नै छैन, २ मिनेट शान्तिसाथ बसेर सम्बन्धको बारेमा, भोलीको बारेमा, अाफ्नो बारेमा सोंच्ने । सम्बन्ध कसरी बलियो बनाउन सकिन्छ भन्ने छलफलको लागि । किन सोंच्ने पनि, त्यति सोंचुञ्जेलसम्ममा अर्को कुनै सम्बन्धले  जोडिसकेको हुन्छ । हो सबै यहाँ हतारमा छन । जिन्दगी एउटा चलेको घडी जस्तै भाको छ, रोकीएर थकाई मार्‍यो भने बिग्रीएछ भन्छन भन्ने डर पनि छ, त्यसैले पनि म अली हतारमैं छु । मेरो लागि भन्दा पनि कोही अरुको लागि तर कसको लागी यो सब हतार मैले ठम्याउन सकेको छैन ?

केही दिन अघिमात्र मेरा एक आत्मीय साथीको मृत्युले स्तब्ध बनायो, सामाजिक सञ्जालमा हतार हतार लेखिदिएँ RIP । शायद! त्यस बेला पनि म निकै हतारमा थिए समवेदना जस्तो सम्वेदनशिल कुरा पनि हतारहतारमै व्यक्त गरे तर कस्तो हतार मृत्युशोक भन्दा पनि ठूलो ? भोली बिहान मालामीमा निस्कनुपर्‍यो, निस्किएँ हतार हतार गरी, दाहँसंस्कारको प्रक्रिया निकै लामो हुने, सबै मलामिहरु सल्बलाउन थाले, दाह संस्कारको प्रक्रिया नसकिदै आधा मलामी त्यहाँ थिएनन । पुरेत पनि छिट्छिटो कार्मकाण्ड विधी गरिरहेको लाग्दा लाग्थ्यो, वहाँ पनि हतारमैं हुनुहुन्थ्यो ।

प्रतिक्रिया दिनुहोस !
Loading comments...
सम्बन्धित खबरहरु

सन् २०१९ को अन्तिमदेखि फैलिन सुरु भएको कोरोनाभाइरस (कोभिड–१९) ले विश्व आक्रान्त बनेको छ । यसबाट संक्रमित २९ लाख ८४

काठमाडौं । स्वास्थ्य तथा जनसंख्या मन्त्रालयले विशेषज्ञ चिकित्सहरुलाई निजी अभ्यास नगर्ने व्यवस्था कडाइका साथ लागू गर्न माताहतका निकायलाई पत्राचार गरेको

काठमाडौं। नेपालमा पछिल्ला दिनहरुमा कोरोनाको संक्रमण तिब्र रुपमा बढेपछि सरकारले देशका १४ जिल्लालाई उच्च जोखिममा राखेको छ। स्वास्थ्य तथा जनसंख्या

काठमाडौं । स्वास्थ्य मन्त्रालयका अनुसार पछिल्ला समय बालबालिका तथा युवा संक्रमण कोभिड संक्रमण बढ्दै गएको छ भने ज्यान गुमाउने पनि