मेरो देशको रातो झन्डा

मेरो देशको रातो झन्डा एक दिन फेरि फरफराउनेछ,
यी ओठले तिम्रो यो गीत बेहोसीमा पनि बरबराउनेछ ।

हाँसीखुसी बरु आधा पेट बस्छु, तर पैसाका लागि बिदेसिन्न आमा,
जन्मऋण चुकाउँछु, तिमीलाई सजाउँछु, यो जीवन गर्छु तिम्रै नाम ।

भूकम्पको धक्का र कोरोनाको मुक्काले ढालेका छन् तिमीलाई अहिले,
मलमपट्टी बाँद्छु, बैसाखीमा राख्छु, हुने छैन टाढा तिमीदेखि कहिले ।

उठी, हिँडी, रम्नेछौ फेरि, छाउनेछ खुसी तिम्रो मुहारमा,
बुद्ध र सीताकी जननी तिमी, फैलनेछ सुवास तिम्रो संसारमा ।

तिम्रो आँगनको गुराँसले एक दिन तिमीलाई नै सजाउनेछ,
मेरो देशको रातो झन्डा त्यस दिनदेखि फेरि फरफराउनेछ ।
•
© डा.कञ्चनजङ्घा प्रसाई, विद्यावारिधि