भारतद्वारा ३० हजार जाँच क्षमता भएको कोभिड–१९ पिसिआर टेस्ट कीट उपहार स्वरुप प्रदान

भारत सरकारका तर्फबाट नेपालका लागि भारतीय राजदूत महामहिम विनय मोहन क्वात्राले नेपाल सरकारका माननीय स्वास्थ्यमन्त्री भानुभक्त ढकाललाई माइल्याबद्वारा उत्पादित प्याथोडिटेक्ट कोभिड–१९ क्वालिटेटिभ आरटी पीसीआर टेस्ट कीटहरु हस्तान्तरण गर्नुभएको छ । भारतीय जनताकातर्फबाट नेपाली जनताका लागि उपहार स्वरुप प्रदान गरिएको सो टेस्ट कीटहरुको सहयोगले नेपालका स्वास्थ्यकर्मीहरुले तीस हजार व्यक्तिको पीसीआर परीक्षण गर्न सक्नेछन् ।

गत वैशाख १० गते राजदूत क्वात्रामार्फत भारत सरकारले नेपाल सरकारलाई २३ टन औषधी हस्तान्तरण गरिसकेको छ । औषधी र परीक्षण कीटको हस्तान्तरणले कोभिड–१९ महामारीले निम्त्याएको साझा चुनौती विरुद्घ तयार रहन, सामना गर्न तथा एकसाथ लड्न दुई देशका नेता एवम जनताबीचको जारी सहकार्यलाई दर्शाउँदछ ।

परराष्ट्रमन्त्री प्रदिप ज्ञवालीले आधिकारीक ट्वीटर ह्याण्डलबाट विशम् परिस्थितिमा अत्यावश्यक यस सहयोगका लागि भारत भारत सरकारलाई धन्यवाद ज्ञापन गर्नुभएको छ ।

Sincere thanks to the Government of India for providing medical logistics and testing kits for 30,000 tests which were handed over to the Ministry of Health and Population today as a part of ongoing cooperation to fight the pandemic.

— Pradeep Gyawali (@PradeepgyawaliK) May 17, 2020

२०७६ चैत्र २ मा भारतका प्रधानमन्त्रीले सार्क राष्ट्रका नेताहरुसँग भिडियो कन्फरेन्स गरेसँगै यी पहलकदमीको सुरुवात भएको हो । भारत सरकार यस चुनौतीको घडीमा नेपाल सरकार, स्वास्थ्यकर्मी तथा नेपाली जनतासँग ऐक्यभाव जनाउँदछ ।