हङ्‌कङ विवाद उत्कर्षमाः अमेरीकी विदेशमन्त्री माइक पोम्पेओद्वारा चिनियाँ अधिकारीहरूलाई अमेरिका प्रवेशमा प्रतिबन्धको घोषणा


हङ्‌कङ विवाद उत्कर्षमा चढेको छ । चीनको संसद्‌द्वारा हङ्‌कङका लागि प्रस्तावित नयाँ कानुनलाई समर्थन र यसका पश्चातका कदमहरुको लागि तयारी गरिरहेकै बेला चीनले “हङकङको लोकतान्त्रिक अधिकारलाई संकुचित पारेको र यस कार्यमा सक्रिय ति नेताहरुको सहभागिता रहेको” निश्कर्ष सहित अमेरिकी विदेशमन्त्री माइक पोम्पेओले चिनियाँ कम्युनिस्ट पार्टीका केही पदाधिकारीहरूलाई अमेरिका प्रवेश गर्न प्रतिबन्ध लगाइएको घोषणा गर्नुभएको छ ।

तत्कालका लागि प्रतिबन्ध लगाइएका ति चिनियाँ नेताहरु को को हुन भन्ने खुलाईएको छैन । पोम्पेओका अनुसार अमेरिकी प्रतिबन्ध सिपीसिका वर्तमान तथा पूर्व अधिकारीहरूप्रति लक्षित रहेको स्पष्ट पार्नुभएको छ र यो प्रतिबन्ध सिनेटको निर्णयअनुरूप घोषणा गरिएको हो ।

केही समय अघि संयुक्त अधिराज्य अमेरीकाका राष्ट्रपति डोनाल्ड ट्रम्पले हङ्‌कङको स्वायत्तताविरुद्ध ल्याउन लागिएको सुरक्षा कानुनका लागि चीनलाई दण्डित गरिने घोषणा गर्नुभएको थियो । त्यस्तै केही समयअघि अमेरिकी सिनेटमा हङ‌कङको लोकतान्त्रिक अधिकार स्वीकार नगर्ने, अनादर गर्नेहरु तथा तिनीहरूसँग कारोबार गर्ने व्यापारी तथा व्यवसायिक प्रतिष्ठानलाई कडा प्रतिबन्ध लगाउने प्रस्तावमा मतदान भएको थियो ।

आइतवारबाट नेशनल पीपुल्स कङ्ग्रेसको स्थायी समिति (चिनियाँ संसद् बैठक) शुरु हुँदैछ । बैठकको पूर्वसंध्यामा अमेरिकाद्वारा ति चिनियाँ अधिकारीहरुलाई अमेरिका प्रवेश गर्न नदिने घोषणा गरेको हो । स्थायी समितिले हङ्‍कङका लागि बनाइएको कानुनबारे छलफल गर्नेछ ।

चीनद्वारा प्रस्तावित कानुनमा हङ्‌कङमा चीनको संवैधानिक अधिकारविरुद्ध हुने कुनैपनि गतिविधिहरू अपराध प्रमाणित हुने तथा बेइजिङले त्यहाँ आफ्ना सुरक्षा निकायहरू स्थापित गर्न सक्ने प्रावधानहरू छन् । उक्त प्रस्तावित कानुनका कारण हङ्कङमा चीनविरोधी प्रदर्शनको नयाँ लहर चलेको छ जुन अहिले उत्कर्णमा पुगेको छ ।

चीनको प्रतिक्रिया?
सिपीसिका वर्तमान तथा पूर्व अधिकारीहरुमाथिको यस प्रतिबन्धका विरुद्ध चीनले अमेरिकाले लगाएको यो निर्णय ‘त्रुटिपूर्ण’ रहेकोले फिर्ता लिनुपर्ने प्रतिक्रिया दिएको छ ।

प्रतिक्रियामा संयुक्त अधिराज्य अमेरीकाको वाशिङ्टनस्थीत चिनियाँ राजदूतावासले आधिकारीक ट्वीटर ह्याण्डलबाट जारी गरेको विज्ञप्तीमा “अमेरिकी पक्षको अन्यायपूर्ण यो निर्णयको कडा विरोध” गर्ने उल्लेख गरेको छ ।

जारी विज्ञप्तीमा, ‘अमेरिकालाई चाँडो आफ्ना गल्तीहरू सच्याउन, प्रतिबन्धको यो निर्णय फिर्ता लिन तथा चीनको आन्तरिक विषयमा हस्तक्षेप नगर्न’ आग्रह समेत गरेको छ ।