लोपोन्मुख अवस्थामा रहेको कुमाल जातिको पुरानो परम्परा तथा सीपको संरक्षण गरी नयाँ पुस्तामा हस्तान्तरण गर्ने उद्देश्यले  चापाकोट नगरपालिकाको सहयोगमा सङ्ग्रहालय निमार्ण हुनेभएको छ । स्याङ्जाको एकता कुमाल समाज चापाकोट– ८ दामाचौरले कुमाल सङ्ग्रहालय निर्माण गर्न शुरु गरेको छ । लोपोन्मुख अवस्थामा रहेका कुमाल समुदायका कला, संस्कृति, भेशभूषा, माटाका भाँडा, पोशाक उक्त सङ्ग्रहालयमा प्रदर्शनका लागि राखिने बताइएको छ ।

माटोका विभिन्न भाँडाकुँडा बनाउने पेशा अँगालेको यो समुदाय पछिल्लो समय परम्पारागत पेशाबाट विस्थापित हुँदै गएको छ । परम्परादेखि चलिआएको पेशाप्रति आजभोलिका युवा आकर्षित नहुँदा कला, संस्कृतिको लोप हुने अवस्था देखिएकाले सङ्ग्रहालय निर्माण गर्न लागेको सकितिको भनाइ रहेको छ ।

घुमाउरो आकारमा निर्माण गरिने उक्त सङ्ग्रहालय तीन वटा तलाको हुनेछ भने त्यसमा तीन वटा सभाकक्ष रहनेछ । सङ्ग्रहालय निर्माणका लागि जनजाति प्रतिष्ठान नेपाल, चापाकोट र स्थानीय समुदायबाट रकम सङ्कलन भएको उक्त समाजका संस्थापक अध्यक्ष राजु कुमालले बताए ।