भारतका पूर्वराष्ट्रपति मुखर्जीलाई भेन्टिलेटरमा राखेर उचार गरिंदै, स्वास्थ्य अवस्था गम्भीर

भारत, २७ साउन, २०७७ । मस्तिष्कमा रगत जमेर डल्लो परेको रगतको टुक्रा निकाल्नका लागि शल्यक्रिया गराएका भारतका पूर्व राष्ट्रपति प्रणब मुखर्जीलाई दिल्लीस्थित आर्मी अस्पतालमा भर्ना गरीएको थियो जहाँ उनको ब्रेन सर्जरी भएको थियो । आर्मी अस्पतालद्वारा मङ्गलवार जारी बुलेटिनमा भनिए अनुसार उनको स्वास्थ्य स्थिति सहज छैन ।

८४ वर्षिय भारतका पूर्वराष्ट्रपति प्रणब मुखर्जीको स्वाब परिक्षणमा नोभल कोरोनाभाइरस (COVID-19) को संक्रमण पोजेटिभ भेटिएको थियो ।

ब्रेन सर्जरीको जटिलतासँगै कोरोनाभाइरसको संक्रमणले थलेका उनको उपचार जारी छ । मुखर्जीको स्वास्थ्य अवस्था जटिल हुँदैगएपछि आजै मङ्गलवार अस्पतालको सघन उपचार कक्ष (ICU – Ventilator) को भेन्टिलेटरमा राखेर उपचार भइरहेको छ । भारतीय सञ्चारमाध्यमहरुद्वारा प्रेसित समाचारमा, “अस्पतालले पूर्वराष्ट्रपतिको स्वास्थ्य अवस्था गम्भीर रहेको तथा आउँदा केही घण्टाहरु उनका लागि महत्त्वपूर्ण हुने” उल्लेख गरेका छन् ।

सन् २०१२ देखि सन् २०१७ सम्म भारतको १३ औं राष्ट्रपतिको रुपमा कार्यकाल सम्हालेका मुखर्जीले अन्तर्राष्ट्रिय मुद्राकोष तथा विश्व बैंकको बोर्डमा रहेर समेत काम गरिसकेका छन् ।

भारतको १३ औं राष्ट्रपति हुनुअघि मुखर्जी भारत सरकारको अर्थमन्त्रालय, रक्षामन्त्रालय तथा परराष्ट्रमन्त्रालयहरुमा मन्त्रीजस्तो महत्त्वपूर्ण पदमा रहेर जिम्मेवारी सम्हालेका थिए ।