काठमाडौं । नेकपामा गुटगत भेलाले तिव्रता पाएका बेला उपाध्यक्ष वामदेव गौतमले आफू कुनै पनि भेलामा सहभागी नहुने बताएका छन् । गौतमका प्रेस सहयोगी विश्वमणि सुवेदीका अनुसार उनले अहिले भेला गर्ने समय नभएको जिकीर गर्दै आफू नजाने तर सचिवालयका पाँचसदस्यको बैठकमा भने सहभागी हुने बताएका हुन् । बैठकबाटै सबै समस्याको हल खोज्नुपर्ने गौतमको भनाइ छ ।

“अहिले भेला गर्ने समय नभएको भन्दै नेकपा उपाध्यक्ष क। वामदेव गौतमले भन्नुभयो – म कुनै पनि भेलामा जान्न, पाँच नेताको बैठकमा भने म जान्छु,” सुवेदीले फेसबुकमा लेखेका छन्, “अहिले भेला गर्ने बेला होइन । बैठकबाट सबै समस्याको हल खोज्ने समय हो ।”

शुक्रबार पेरिसडाँडामा कार्यकारी अध्यक्ष पुष्पकमल दाहाल प्रचण्ड र वरिष्ठ नेता माधवकुमार नेपाल समूहले प्रदेश १ का जिल्ला अध्यक्ष र सचिवहरुको भेला गरेको थियो । जसमा प्रचण्ड, नेपाल र वरिष्ठ नेता झलनाथ खनाल सम्बोधन गरेका थिए । उक्त भेलामा गौतम सहभागी भएनन् ।