नवनियुक्त उर्जामन्त्री रायमाझी तथा भारतीय राजदूत क्वात्राबिच भेट
१४ पुष २०७७, मंगलवार २०:२४
काठमाण्डौ । प्रतिनिधी सभा विघटन पछि नियुक्त भएका ऊर्जा, जलस्रोत र सिंचाई मन्त्री टोप बहादुर रायमाझी तथा नेपालका लागि भारतीय राजदूत विनय मोहन क्वात्राबिच भेट भएको छ । भेटमा भारतीय राजदूत क्वात्राले नवनियुक्त मन्त्री टोप बहादुर रायमाझीलाई बधाई दिनुभएको थियो ।
दुवैबिच नेपाल-भारत संयुक्त परियोजनाहरूको कार्यान्वयन तथा द्विपक्षीय उर्जा सहकार्यका गतिविधिहरुलाई थप प्राथमिकताका साथ अघि बढाउने बिषयमा छलफल गरिएको थियो । दुवै देशबिच विद्युत क्षेत्रमा भइरहेको सहकार्य सम्बन्धमा केन्द्रित उक्त छलफलमा ठूला-ठूला संयुक्त परियोजनाहरूको सिघ्र समापनका लागि आवश्यक सहजीकरण गर्ने लगायतका बिषयबस्तु केन्द्रित थिए ।
सन् २०१४ मा विद्युत् व्यापार सम्झौतामा हस्ताक्षर भए पछि भारत र नेपालको जलविद्युत् क्षेत्रमा बहुपक्षीय संलग्नता हुँदै आएको छ । परियोजनाहरु विगत चार-पाँच वर्षमा उल्लेखनीय रूपमा अगाडि बढिरहेका छन् । यसमा नेपाली जलविद्युत क्षेत्रमा भारतीय लगानी, उच्च भोल्टेज र मध्यम भोल्टेज क्रस बोर्डर ट्रान्समिशन लाइन, विद्युत व्यापारको सुविधाको साथै ग्रिड अपरेशनमा समन्वयहरु समावेश रहेका छन् ।
