मुम्बई । बलिउड अभिनेता अमिताभ बच्चनले ‘कौन बनेगा करोडपति १२’ को अन्तिम एपिसोडको छायांकन सकाएका छन् । उनले आफ्नो ब्लगको अन्तिम एपिसोडको छायांकनबारे लेखेका छन् । जसमा उनले अवकाश (रिटायर्ड) बारे पनि कुरा गरेका छन् ।

उनले रिटायरमेन्टबारे लेखेका छन्, “म अब थाकिसकेको छु र रिटायर भइसकें… म तपाईंहरु सबैसँग माफी चाहन्छु… कौन बनेगा करोडपति छायांकनको यो अन्तिम दिन निकै लामो भयो… सायद भोलि ठीक हुनेछु, तर याद राख्नुहोस्… काम त काम हो त्यसैले यसलाई पूर्ण जोशका साथ गरिनुपर्छ ।” साथै उनले सेटमा बिताएको अन्तिम रमाइलो र प्यारो क्षणलाई पनि उल्लेख गरेका छन् । अन्तिम दिन एक-अर्कामा माया साटासाट गरेको पनि अमिताभले ब्लगमा समेटेका छन् । उनले कोरोना भाइरससँगको लडाइँमा जित हासिल गरेसँगै केबीसी १२ को छायांकन पुनः सुरु गरेका हुन् ।