काठमाडौं । प्रधानमन्त्री केपी शर्मा ओलीले आगामी निर्वाचनमा पुष्पकमल दाहाल प्रचण्ड-माधव नेपाल पक्षको १० सिट पनि नआउने दाबी गरेका छन् ।

आफूनिकट आदिवासी जनजाति महासंघ नेपालको राष्ट्रिय भेलालाई बुधबार सम्बोधन गर्दै ओलीले आगामी निर्वाचनमा प्रचण्ड-नेपाल अवस्था प्रक्षेपण गरेका हुन् । उनले प्रचण्ड-नेपाल पक्ष सफलताको बाटोतर्फ नहिँडेर भिरको बाटो हिँडेको टिप्पणी पनि गरे । जनताले उक्त पक्षलाई कहिल्यै माफ नगर्ने प्रधानमन्त्री ओलीको भनाइ छ । उनले वैशाख २७ गतेसम्म पुग्दा प्रचण्ड-नेपाल पक्ष बरफ पग्लिए जसरी पग्लिएरै सकिने पनि बताए । प्रधानमन्त्री ओलीले आधिकारिक पार्टी आफूहरुको भएको पनि बताए । विगतमा पार्टी र सरकार चलाउन नदिई खुट्टा तानिएको भन्दै उनले आगामी दिनमा नीतिगत तथा वैचारिक आधारमा पार्टी र सरकारलाई ठीक ढंगले चलाएर पार्टीलाई एकढिक्का बनाइ अघि बढाउने पनि बताए ।