आम हड्तालका लागि दाहाल–नेपाल नेकपाले तोक्यो ११ कमाण्डर

पुष्पकमल दाहाल प्रचण्ड–माधवकुमार नेपाल नेतृत्वको नेकपाले बिहीबारका लागि आयोजना गरेको आम हड्ताल कार्यान्वयन गराउन राजधानीका ११ प्रमुख स्थानका लागि कमान्डर तोकेको छ ।

जसअनुसार गोंगबुमा भीम रावल, बालाजुमा रघुजी पन्त र रत्नपार्कमा प्रवक्ता नारायणकाजी श्रेष्ठ तथा जनार्दन शर्माले कमान्ड सम्हाल्नेछन् ।

त्यसैगरी पुल्चोकमा पम्फा भुसाल, कोटेश्वरमा लीलामणि पोखरेल, चाबहिलमा वर्षमान पुन र हरिबोल गजुरेल, नारायणगोपालचोक महाराजगञ्जमा शक्ति बस्नेतलाई कमाण्डर तोकिएको छ ।

कलङ्की चोकमा युवराज ज्ञवाली र अष्टलक्ष्मी शाक्य, बल्खुमा बेदुराम भुसाल र सातदोबाटोमा देव गुरुङ कमान्डर तोकिएको सो समूहले जनाएको छ ।

बुधबार आकस्मिक रुपमा पत्राकार सम्मेलन गरेर सो देशव्यापी राजनीतिक हड्तालको घोषणा गरेको हो । आम हड्तालमा विद्यालय, यातायात, उद्योग, कलकारखाना सबै बन्द गराउने सो पार्टीले बुधबार पत्रकार सम्मेलन गरेर जानकारी दिएको छ ।