आगामी निर्वाचनको लागि सामाग्री खरिद गर्न टेण्डर आह्वानको तयारी

काठमाडौं । निर्वाचन आयोगले आउँदो वैशाख १७ र २७ गतेका लागि मध्यावधि निर्वाचनका लागि आवश्यक सामाग्री खरिदका लागि टेण्डर आह्वानको तयारी गरेको छ ।

टेण्डर आह्वान गर्ने आज तयारी भैरहेको आयोगका सहप्रवक्ता कोमलप्रसाद धमलाले जानकारी दिए । प्रतिनिधिसभा विघटनसँगै तोकिएको मितिमै चुनाव गराउने तयारीसहित आयोग लागिपरेको र आवश्यक सामाग्री खरिदका लागि टेण्डर आह्वन गर्न लागिएको उनको भनाइ छ ।

प्रतिनिधिसभा विघटनविरुद्ध परेको रिटबारे सर्वोच्चको फैसला नआइसकेको र नेकपाभित्रको विवाद समाधान नभैसकेको अवस्थामा आयोगले चुनावी तयारीलाई तिब्रता दिएको हो ।

प्रतिनिधि सभा विघटनसँगै आउँदो वैशाख १७ र २७ गतेका लागि मध्यावधि चुनाव घोषणा भएको छ । पहिलो चरणमा वैशाख १७ गते ४० जिल्लामा र दोस्रो चरण २७ गते ३७ जिल्लामा चुनाव गराउने सरकारको तयारी रहेको छ ।

वैशाख १७ गते कर्णाली, लुम्बिनी, प्रदेश २, गण्डकीका ४० जिल्लामा तथा दोस्रो चरणमा सुदूरपश्चिम, वाग्मती र प्रदेश १ का ३७ जिल्लामा चुनाव गर्ने सरकारले निर्णय गरेको छ ।