काठमाडौं । नेपाल कम्युनिस्ट पार्टी (नेकपा) को प्रचण्ड–नेपाल समूह आज (शनिबार) ‘जनयुद्ध’ दिवस मनाउँदैछ । २५ वर्षअघि ‘जनयुद्ध’ सुरु भएको दिनको सम्झनामा नेकपाको प्रचण्ड–नेपाल समूह दिवस मनाउन लागेको हो ।

२०५२ साल फागुन १ गते औपचारिक रुपमा तत्कालीन नेकपा माओवादीले ‘जनयुद्ध’ को सुरुवात गरेको थियो । तीन वर्षअघि तत्कालीन नेकपा एमाले र तत्कालीन नेकपा माओवादी केन्द्रबीच एकीकरण भएपछि बनेको नयाँ दल नेकपाले यसअघि एकीकृत रुपमा ‘जनयुद्ध’ दिवस मनाएको थियो ।

तर, यसपाली प्रतिनिधि सभा विघटनसँगै नेकपामा आएको विभाजनका कारण प्रचण्ड–नेपाल समूहमात्रै ‘जनयुद्ध’ दिवस मनाउन लागेको छ । उक्त समूहले केन्द्रीय कार्यालय पेरिसडाँडामा बिहान ९ बजे विभिन्न आन्दोलन र ‘जनयुद्ध’ मा सहिद भएकाहरूको स्मृतिमा सभा आयोजना गरिने जनाएको छ ।

कार्यक्रममा अध्यक्ष पुष्पकमल दाहाल ‘प्रचण्ड’ सहभागी हुने छन् भने अर्का अध्यक्ष माधवकुमार नेपालको उपस्थिति रहने छैन । उनी धनकुटामा रहेकाले ‘जनयुद्ध’ दिवसको अवसरमा आयोजना हुन गइरहेको कार्यक्रममा उपस्थित हुन असमर्थ रहने बताइएको छ ।

यद्यपि प्रचण्ड–नेपाल समूहले सल्लाह गरेरै पेरिसडाँडामा कार्यक्रम राखिएको जनाएको छ । पेरिसडाँडाले ‘जनयुद्ध’ दिवसको अवसरमा ‘सहिद स्मृति तथा सम्मान कार्यक्रम’ को ब्यानरमा आफ्नो अनुकूलतामा सबै जिल्लालाई कार्यक्रम आयोजना गर्न ‘सर्कुलर’ जारी गरेको छ ।

२०५२ फागुन १ गतेबाट सशस्त्र हिंसा सुरु गरेको दिनलाई तत्कालीन माओवादीले ‘जनयुद्ध’ दिवसका रूपमा मनाउँदै आएको छ । १० वर्षसम्म चलेको हिंसात्मक शसस्त्र विद्रोहका क्रममा झण्डै १७ हजार नेपालीको ज्यान गएको थियो ।