इस्लामावाद । पाकिस्तानमा शुक्रबार राति शक्तिशाली भूकम्प गएको छ । यसको धक्का पाकिस्तानका विभिन्‍न जिल्लाहरु खैबर पख्तुनख्वा र पञ्‍जाबसहित भारतीय क्षेत्रमा सहित महसुस गरिएको पाकिस्तानी सञ्‍चारमाध्यम डनले जनाएको छ ।

पाकिस्तानमा राजधानी इस्लामावाद, लाहोर र पञ्‍जाबका विभिन्‍न सहरमा धक्क महसुस गरिएको जनाइएको छ । हालसम्म कुनै पनि मानवीय र भौतिक क्षति भएको विवरण प्राप्त भएको छैन ।

जिओ न्युजका अनुसार ६.४ रेक्टरस्केलको भूकम्प गएको जनाइएको छ । पाकिस्तानको स्थानीय समय अनुसार १०:०२ बजे राति भूकम्प गएको हो ।

भूकम्प गएलगत्तै मानिसहरु घरबाहिर निस्किएका थिए । भूकम्पको धक्का महसुस गरेकाहरुले सामाजिक सञ्‍जालमा विभिन्‍न प्रतिक्रियाहरु पोस्ट गरिरहेका छन् ।