ओलीले दिए चुनौती– समानुपातिकमा ५० लाख भोट ल्याउँछौँ, घटाएर देखाउनुस्

काठमाडौं । प्रधानमन्त्री एवं नेकपा ओली समूहका अध्यक्ष केपी शर्मा ओलीले आगामी चुनावमा आफ्नो समूहले बहुमत ल्याउने दाबी गरेका छन् ।

शनिबार बुटवलमा आयोजित सभामा बोल्दै उनले निर्वाचनबाट किन आत्तिएको ? भन्दै प्रचण्ड–नेपाल समूहलाई प्रश्न गरे । “म भन्न चाहन्छु उहाँहरुलाई, ५० लाख समानुपातिक मत ल्याउँछौँ । घटाएर देखाउनुस् न त्यो मत । प्रत्यक्षतर्फ बहुमत सिट लिएर आउँछौँ । त्यो घटाएर देखाए भो नि । किन आत्तिनु, तर्सिनुभएको चुनावबाट ?”, उनले भने ।

को लोकप्रिय भन्ने निर्वाचनबाट देखिने उनले उल्लेख गरे । उनले माघ २८ गतेको प्रचण्ड–नेपाल समूहको सभामा १४ जना वक्ता बोलाएर ‘गाली पुराण’ सुनाएको भन्दै कटाक्षसमेत गरे ।