nepali congress logo

कांग्रेसको क्रियाशील सदस्यता छानबिन समितिको पहिलो बैठक, यस्ता छन् निर्णयहरु


काठमाडौं । नेपाली कांग्रेसको केन्द्रीय क्रियाशील सदस्यता छानबिन समितिले क्रियाशील सदस्यतासम्बन्धी विवरण बुझाउन बाँकी रहेका जिल्लाहरुलाई क्रियाशील सदस्यताको सम्पूर्ण विवरणसहितका कागजात र नामावलीको सूची केन्द्रमा पठाउनका लिखित पत्राचार गर्ने निर्णय गरेको छ ।

केन्द्रीय सदस्य रमेश लेखकको संयोजकत्व गठित समितिको शनिबार बसेको बेठकले क्रियाशील सदस्यतासम्बन्धी विवरण बुझाउन बाँकी रहेका जिल्लाहरुलाई क्रियाशील सदस्यताको सम्पूर्ण विवरणसहितका कागजात र नामावलीको सूची केन्द्रमा पठाउनका लिखित पत्राचार गर्ने निर्णय गरेको हो ।

“क्रियाशील सदस्यताको नामावलीको प्रमाणित सूची, सदस्यता शुल्क, सहयोग रकम (लेवी) र गाउँपालिका-नगरपालिका, प्रदेश सभा क्षेत्र, प्रतिनिधि सभा क्षेत्र र जिल्ला कार्यसमितिको निर्णय प्रतिलिपीसमेत क्रियाशील सदस्यता सम्बन्धी सम्पूर्ण विवरण केन्द्रमा बुझाउन बाँकी रहेका सबै जिल्ला कार्यसमितिहरु र प्रतिनिधि सभा क्षेत्रीय कार्यसमितिहरुलाई केन्द्रीय कार्यसमितिको फाल्गुण ०६, २०७७ को बैठकको निर्णय अनुसार, तोकिएको मितिभित्र नै सम्पूर्ण कार्य तोकिएको प्रक्रिया पुर्‍याई सम्पन्न गर्न र क्रियाशील सदस्यताको सम्पूर्ण विवरण सहितका कागजात र नामावलीको सूची केन्द्रमा पठाउनका लागि समितिको तर्फबाट लिखित पत्राचार र प्रेस विज्ञप्तिमार्फत अनुरोध गर्ने,” बैठकपछि जारी विज्ञप्तिमा भनिएको छ ।

बैठकले जिल्ला सभापति, क्षेत्रीय सभापति र मातहत तहको सभापतिसँग सम्पर्क गरि क्रियाशील सदस्यता वितरण र नवीकरणका सम्बन्धमा जिल्लाहरुमा हालसम्म भइरहेको कार्य प्रगतिको पछिल्लो अवस्थाको जानकारी लिन र तोकिएको मितिभित्र तोकिए बमोजिमका सम्पूर्ण कार्य अनिवार्य सम्पन्न गर्नका लागि ध्यानाकर्षण गराउन समितिका सदस्यहरुलाई जिम्मेवारी पनि दिएको छ ।

बैठकले समिति सदस्य आनन्दप्रसाद ढुंगाना र जीवन परियारलाई प्रदेश नं. १ र २ को, श्यामकुमार घिमिरे र प्रदीप पौडेललाई वाग्मती प्रदेश र गण्डकी प्रदेशको तथा कल्याणकुमार गुरुङ र योगेन्द्र चौधरीलाई लुम्विनी प्रदेश, कर्णाली प्रदेश र सुदूरपश्चिम प्रदेशको जिम्मेवारी दिइएको कांग्रेसका सचिव केशव रिजालले जानकारी दिए ।

बैठकले समितिको सचिवमा कांग्रेस केन्द्रीय कार्यालयका सचिवहरु डा. प्रदिप पराजुलीलाई प्राविधिकतर्फ र केशव रिजाललाई प्रशासन र निर्णय प्रक्रियातर्फ सचिवमा नियुक्त गरेको छ ।

कांग्रेसको १३ औं महाधिवेशनको केन्द्रीय क्रियाशील सदस्यता छानबिन समितिको कार्यविधिलाई आवश्यक संशोधन र परिमार्जन गरि समितिका सचिव रिजालले समितिको आगामी बैठकमा मस्यौदा प्रस्तुत गर्ने पनि जिम्मेवारी बैठकले दिएको छ । समितिको अर्को बैठक फागुन ११ गते बिहान ११ बजे पार्टी केन्द्रीय कार्यालयमा बस्ने भएको छ ।


Loading comments...