नेपाली जनतालाई कम्फर्टेबल सरकार चाहियो, मलाई हटाउन सजिलो छैन : प्रधानमन्त्री ओली


काठमाडौं । प्रधानमन्त्री केपी शर्मा ओलीले आफूलाई हटाउनसक्छ भने कसैले हटाए हुन्छ भन्दै चेतावनी दिएका छन् । झापामा मंगलबार पूर्वाञ्‍चल क्यान्सर अस्पतालको उद्घाटन कार्यक्रमलाई सम्बोधन गर्दै प्रधानमन्त्री ओलीले कसैले सक्छ भने हटाउन चेतावनी दिँदै आफूलाई हटाउन सजिलो नभएको बताएका छन् ।

उनले भने, “अब देश कसरी अघि बढ्छ ? मैले अदालतको फैसला मान्‍ने हो, कार्यान्वयन गर्ने हो । २३ गते अधिवेशन बोलाएको छु । म राम्ररी अधिवेशन चलाउने प्रयास हुन्छु । मेरो सकारात्मक भूमिका हुन्छ । म राजनीतिक गर्ने मान्छे हो । मलाई कसैले पनि हटाउन सक्छ भने हटाओस् । तर, सजिलो छैन ।”

उनले आगामी चुनावमा फेरि दुई तिहाइका साथ सिंहदरबार प्रवेश गर्ने बताएका छन् । उनले भने, “म नेपाली जनताका बीचमा जान्छु । म न्याय माग्‍न जान्छु । दुई वर्षपछि त चुनाव आइसक्छ । दुई तिहाइका साथ सिंहदरबारमा फर्किन्छु ।”

प्रधानमन्त्री ओलीले जनतालाई समृद्ध बनाउनका लागि कोरिएको बाटोलाई अलमलिन नदिने र तगोरोहरु हटाएर अघि बढ्ने बताएका छन् । उनले थपे, “हामी छिमेकीसँग पनि मित्रवत सम्बन्ध राखेर अघि बढ्छौं । कोही अरुका लागि कम्फर्टेबल होइन कि नेपाली जनतालाई कम्फर्टेबल सरकार चाहियो । नेपाली जनताका आवश्यकता पूरा गर्ने सरकार चाहियो । त्यसकारण हामी नेपाल र नेपालीका लागि काम गर्छौं । सबैसँग मित्रता राख्छौं । हाम्रो गन्तव्य समृद्ध नेपाल सुखी नेपाली बनाउने कुरा हो ।”

उनले सर्वोच्चले फैसला गर्दैमा चिन्ता गर्नु आवश्यक नभएको बताएका छन् । उनले भने, “चिन्ता गर्ने होइन । कतर्व्यप्रति निष्ठाका साथ अघि बढ्ने हो । कसैले बिथोल्‍न खोज्छ भने त्यसलाई रक्षा गर्दै अघि बढ्ने हो ।”


Loading comments...