यूरोपेली देश युक्रेनले प्राप्त गर्यो भारतीय खोप
२२ फाल्गुन २०७७, शनिबार १९:५७
युक्रेन । पूर्वी युरोपेली देश युक्रेनले पहिलो पटक कोभिड–१९ बिरुद्धको खोप प्राप्त गरेको छ । विश्वका धेरै मुलुकहरुले कोभिड–१९ बिरुद्धको खोप प्रयोग गरिरहेका बेला युक्रेनमा भने हालै मात्र पहिलो पटक खोप पुगेको हो ।
सिरम इन्स्टिच्युट अफ इण्डियामा उत्पादन गरेको अस्ट्रेजेनेकाको पाँच लाख डोज खोप युक्रेनले प्राप्त गरेको हो । बिभिन्न पाँच चरणमा लगाइने खोप पहिलो चरणमा प्राथमिकतामा परेका करिब तीन लाख ६७ हजार मानिसमा लगाइने स्वास्थ्यमन्त्री माक्सिम स्तिपनोभले बताएका छन् ।
पहिलो प्राथमिकतामा स्वास्थ्यकर्मी, दिर्घरोगी, ६० बर्ष माथिका मानिसहरु रहेका छन् । विश्वका अधिकांस मुलुकमा कोभिड–१९ बिरुद्धको खोप लगाइरहँदा युक्रेनमा भने ढिलो भएको भन्दै राष्ट्रपति भोलोदिमिर जेलेन्स्कीको आलोचना भएको थियो । उनले भने पश्चिमा मुलुकहरुले पिफाइजर र मोडेर्नाका खोपहरु भारी मात्रामा प्रयोग गरिरहेको कारण आफुहरुले समयमा नपाएको भन्दै खोप उपलब्ध गर्न युरोपियन युनियनलाइ आग्रह गरेका थिए ।
त्यस्तै, विश्व स्वास्थ संगठनले युक्रेनमा ८० लाख डोज कोभाक्स खोप उपलब्ध गर्ने प्रतिबद्धता गरेको छ । युक्रेनले अस्ट्रेजेनेका र नोभाभाक्सको एक करोड ७० लाख डोज खोप ल्याउने बताएको छ । पश्चिमासँग नजिक युक्रेन सरकारले रुसमा उत्पादित स्पुतनीक भी खोप प्रयोग गर्ने आग्रह अस्वीकार गर्दै आएको थियो । स्पुतनीक भी खोप केवल भू–राजनीतिको माध्यम भएको युक्रनको टिप्पणी छ । ४ करोड भन्दा बढी जनसंख्या रहेको यूक्रेनमा हाल सम्म कोभिड–१९ का १३ लाख संक्रमित छन् भने २५ हजार बढीले ज्यान गुमाएका छन्।
