टोरोन्टो । चीनमा अल्पसंख्यक उइगर मुस्लिम जातिमाथिको दमनलाई नरसंहार घोषणा गर्न सरकारसंग माग गर्दै क्यानडाको तल्लो सदनले गैर–बाध्यकारी प्रस्ताव पेश गरेको छ ।

स्रोतः जस्ट अर्थ न्युज

चीनको सिन्जियाङ प्रान्तमा अल्पसंख्यक उइगर मुस्लिम जातिमाथि सरकारी दमनको आलोचना गर्दै क्यानडाको तल्लो सदनले सरकार समक्ष प्रस्ताब पेश गरेको हो । प्रस्ताबमा मतका लागि प्रधानमन्त्री जस्टिन ट्रुडो र उनका दल लिबरल पार्टीका ६० भन्दा बढी संसद अनुपस्थित थिए । कन्जरभेटीभ ब्लक क्वेबेकोस, न्यु डेमोक्रेटिक पार्टी र ग्रीन पार्टीले प्रस्ताबको पक्षमा मत दिएका छन् । त्यस्तै पाँच स्वतन्त्र संसदहरुले पनि प्रस्ताब पक्षमा मतदान गरेका छन्।

प्रधानमन्त्री ट्रुडो अनुपस्थित रहेको भन्दै कन्जरभेटिभ पार्टीका नेता इरिक ओ टुलले उनको आलोचना गरे। उनले संसदको भावनाको कदर गर्न र सन् २०२२ मा बेइजिङमा हुने वीन्टर ओलम्पीक खेल बहिष्कार गर्न पनि माग गरेका छन्। यसअघि, प्रधानमन्त्री ट्रुडोले नरसंहार शब्द संवेदनशील भएको र यसको प्रयोग गर्दा उचित अन्तर्राष्ट्रिय मान्यता ख्याल गर्नुपर्नेमा जोड दिएका थिए ।

प्रस्ताब गैर–बाध्यकारी भएको र प्रधानमन्त्री ट्रुडोको यस्तो अभिव्यक्तिहरुले प्रस्तावमाथि थप छलफल हुनेमा आशंका व्यक्त गरिएको छ। क्यानडा सरकारले विश्वका अल्पसंख्यक माथिको दमनलाई ध्यानमा राख्दै त्यसबिरुद्ध कारबाहीको लागि आवाज उठाउने सांसदहरुले बताए । चीनको सिन्जियाङमा १० लाख भन्दा बढी अल्पसंख्यक उइगरलाई चिनियाँ सरकारले श्रमशीवीरमा बन्दी बनाइएको भन्दै अन्तराष्ट्रिय मानवअधिकारबादी सस्थाहरुले आलोचना गर्दै आएका छन् ।