तान्जानियाको पहिलो महिला राष्ट्रपति बनिन् सामिया

डार इस सालम । तान्जानियाको पहिलो महिला राष्ट्रपतिको रुपमा सामिया सुलुहु हसनले शपथ ग्रहण गरेकी छन् । राष्ट्रपति जोन मागुफुलीको निधनपछि उपराष्ट्रपति सामियाले राष्ट्रपतिको शपथ ग्रहण गरेकी हुन् ।

राजधानी डार इस सालममा आयोजित शपथ ग्रहण समारोहमा कालो सुट र रातो स्कार्फमा सजिएकी सामियाले भनिन्, “म, सामिया सुलुहु हसन तान्जानियाको संविधानको संरक्षण र इमान्दारिताका साथ पालना गर्ने प्रतिबद्धता गर्दछु ।”

शपथ ग्रहणपछि राष्ट्रपतिको रुपमा गरेको पहिलो सम्बोधनमा उनले ६१ वर्षको उमेरमा मृत्यु भएका राष्ट्रपति जोन मागुफुलीको निधनप्रति २१ दिनसम्म शोक मनाउने घोषणा गरेकी छन् भने मार्च २२ देखि २५ सम्म सार्वजनिक बिदा दिने घोषणा गरेकी छन् ।

उनले भनिन्, “अहिले कुरा गर्ने उपयुक्त समय होइन किनकी अहिले हाम्रो मुटुमा ठूलो चोट लागेको छ । मैले आज मेरो जीवनका अहिलेसम्मका भन्दा फरक स्थितिमा शपथ ग्रहण लिएकी छु । यसअघि खुसीका साथ शपथ ग्रहण गर्ने गरेकी थिए । तर, मुलुकको सर्वोच्च पदको शपथ ग्रहण गर्दा हामी शोकमा छौं ।”राष्ट्रपति मागुफुली करिब दुई सातादेखि सार्वजनिकरुपमा देखिएका थिएनन् । तर, दुई सातापछि बिहीबार उनको निधन भएको खबरले मुलुकलाई नै शोकको स्थितिमा पुर्‍याएको छ ।

तान्जानियानको संविधान अनुसार बहालवाला राष्ट्रपतिको मृत्यु भएपछि बाँकी रहेको कार्यकाल उपराष्ट्रपति रहेको व्यक्तिले नै राष्ट्रपतिको जिम्मेवारी सम्हाल्नुपर्ने प्रावधान रहेको छ ।