एनएसएल अक्सनमा आठ खेलाडी महँगो मूल्यमा बिक्री


काठमाडौं । नेपाल स्पोर्टस म्यानेजमेन्टको आयोजनामा हुने फ्रेन्चाइज फुटबल प्रतियोगिता ‘नेपाल सुपर लिग’ (एनएसएल) को खेलाडी बिक्री (अक्सन) सकिएको छ । शुक्रबार आयोजना गरिएको अक्सन सकिँदा आठ खेलाडी विभिन्‍न टीममा महँगो मूल्यमा बिक्री भएका हुन् ।

सर्वाधिक महँगो मूल्यमा अनुबन्धित हुने खेलाडीमा सुजल श्रेष्ठ, दीप कार्की,दिनेश राजवंशी, विकास खवास, एरिक विष्ट, तेज तामाङ, सुनिल बल र विशाल सुनुवार रहेका छन् ।

‘ए’ श्रेणीमा रहेका उनीहरु अधिकतम मूल्य २ लाखमा अनुबन्धित भएका हुन् । मिडफिल्डर सुजल र गोलकिपर दीप पोखरा थन्डर्स अनुबन्धित भए ।

डिफेन्डर विकास खवास र गोलकिपर विशाल एफसी चितवनमा अनुबन्ध हुँदा तेज काठमाडौं रेजर्समा अनुबन्धित भएका हुन् । यस्तै डिफेन्डर दिनेश धनगढी एफसी र मिडफिल्डर एरिक विष्ट ललितपुर सिटीमा अनुबन्धित भए । अक्सनमा कुल १ सय ४९ जना खेलाडीलाई समावेश गरिएको थियो ।

लिगमा विराटनगर सिटी फुटबल क्लब, काठमाडौं रेजर्स फुटबल क्लब, ललितपुर सिटी फुटबल क्लब, एफसी चितवन, धनगढी एफसी, पोखरा थन्डर्स र बुटवल लुम्बिनी एफसी रहेका छन् । त्रिपुरेश्वरस्थित दशरथ रंगशालामा आयोजना हुने लिग बैशाख ११ गतेदेखि २५ गतेसम्म सञ्चालन हुनेछ ।


Loading comments...