मेलम्चीको पानी आजदेखि धारामा
१५ चैत्र २०७७, आईतवार ०८:३४
काठमाडौं- मेलम्ची खानेपानी आयोजनाको पानी आइतबार काठमाडौंका उपभोक्ताको धारामा खस्ने भएको छ ।
मेलम्ची खानेपानी आयोजनाका प्रवक्ता राजेन्द्र पन्तकाअनुसार सुन्दरीजलस्थित प्रशोधन केन्द्रबाट आइतबारदेखि थोक वितरण प्रणाली हुँदै घरघरमा पानी पुग्ने छ ।
पहिलो दिन आइतबार चार करोड लिटर पानी वितरण गरिँदैछ । पानी काठमाडौं उपत्यका खानेपानी लिमिटेड (केयूकेएल) को पुरानै प्रणालीबाट वितरण गरिने छ ।
सरकारी अधिकारीहरुका अनुसार सुन्दरीजलमा प्रशोधित पानी उपत्यकाका १० ठाउँमा पुग्नेछ ।
मीनभवन, अनामनगर, आरुबारी, महांकाल, बाँसबारी, बालाजु, पानीपोखरी, कीर्तिपुर, भक्तपुरको बोडे र ललितपुरको खुमलटारमा पानीट्यांकी बनाइएको छ ।
१० फागुनमा परीक्षणका लागि मुहानबाट सुरुङमा छाडिएको पानी झन्डै २७ किलोमिटर सुरुङ पार गर्दै १२ दिनपछि सुन्दरीजलमा आइपुगेको थियो ।
