घनश्याम भुसाल र सुरेन्द्र पाण्डेमाथिको कारबाही भद्दा मजाक हो : योगेश भट्टराई

काठमाडौं । नेकपा एमालेका प्रचार विभाग प्रमुख योगेश भट्टराईले नेताद्वय घनश्याम भुसाल र सुरेन्द्र पाण्डेमाथि गरिएको कारबाहीलाई भद्दा मजाकको संज्ञा दिएका छन् ।

एमालेका अध्यक्ष केपी शर्मा ओलीले उपमहासचिव भुसाल र स्थायी कमिटी सदस्य सुरेन्द्र पाण्डेलाई छ महिनाका लागि निलम्बन गरेपछि उनले कारबाहीलाई भद्दा मजाकको संज्ञा दिएका हुन् ।

“ऋषिमुनी र बुद्धको ज्ञान भूमि अनि मार्क्सवादको उर्वर भूमि नेपालमा आजकाल : विद्वान, इमान्दार र नैतिकवानहरु माथि कारबाही हुन्छ । मुर्ख, भ्रष्ट र अनैतिकहरु पुरस्कृत हुन्छन् । कमरेड घनश्याम र सुरेन्द्रजी माथि त्यस्तै भद्दा मजाक गरिएको छ,” प्रचार विभाग प्रमुख भट्टराईले ट्विट गरेका छन् ।

प्रधानमन्त्रीसमेत रहेका अध्यक्ष ओलीले बिहीबार भुसाल र पाण्डेलाई छ महिनाका लागि निलम्बन गरेका थिए । उनले यसअघि गत सोमबार वरिष्ठ नेता माधवकुमार नेपाल र उपाध्यक्ष भीम रावललाई पनि छ महिनाका लागि निलम्बन गरेका थिए ।

नेताद्वय भुसाल र पाण्डेले मंगलबार स्पष्टिकरणपत्रको प्रतिप्रश्नसहित जवाफ दिएका थिए । उक्त जवाफ सकारात्मक र चित्तबुझ्दो नभएको भन्दै अध्यक्ष ओलीले पार्टीले कारबाहीको निर्णय लिएको बताएका छन् ।