सुत्ने समय घटाउँदै मानिस, विश्वव्यापी समस्या बन्ने खतरा !

काठमाडौं । पछिल्लो समय मानिसहरूले निद्रालाई बेवास्ता गर्न थालेको एक अध्ययनले देखाएको छ । विभिन्न प्रविधिको आविष्कारसँगै मानिसले आफ्नो सुत्ने अवधि घटाउन थालेका हुन् ।

त्यस्तै खानपिन तथा जीवनशैलीका कारण पनि निद्रामा गडबडी हुने विज्ञहरूले बताएका छन् । निद्रा कम गर्न कतिपयले कफीलगायतका खानेकुरा अधिक खाने गरेको पाइएको छ । त्यस्तै स्मार्ट फोन, कम्प्युटर आदि प्रविधिको प्रयोगले पनि निद्रा गडबडी हुने गरेको पाइएको छ ।
नेदरल्यान्डमा गरिएको अध्ययनअनुसार करिब ३२ प्रतिशतले सामान्य सुताईमा गडबडी भएको बताएका छन् । त्यस्तै करिब ४४ प्रतिशतले सुताई नपुगेको बताएका छन् ।

नर्वेका १ हजार २८५ विद्यार्थीमा गरिएको अध्ययनका अनुसार करिब ११ प्रतिशतले आफ्ना व्यवहारकै कारण कम सुत्ने गरेको देखिएको छ । १६ देखि १९ वर्ष समूहका ती विद्यार्थीले कम सुत्ने गरेको बताएका छन् । पछिल्लो एक सर्वेक्षणले भने अमेरिकाका करिब ८ करोड ३० लाख मानिस ७ घण्टा सुत्ने गरेको देखाएको छ ।

पछिल्लो समय कम सुत्ने मानिसको बानीले विश्वव्यापी खतरा निम्तिने सम्भावना रहेको सरोकारवालाले जनाएका छन् ।कम सुत्नाले प्रतिरोधात्मक प्रकार्यमा ह्रास हुने, मोटोपनको जोखिम हुने, मुटु रोगसँग सम्बन्धित रोगहरू लाग्ने आदि समस्या हुन सक्छ । एकैपटक धेरै संख्यामा यस्तो समस्या हुन सक्ने अध्ययनकर्ताहरूले बताएका छन् ।