हलिउडमा अन्तरंग दृश्य छायांकनमा नयाँ मापदण्ड
२७ चैत्र २०७७, शुक्रबार २२:११
लसएन्जल्स–टाइम्स अप अभियानले हलिउड फिल्ममा देखाइने अन्तरंग दृश्यमा नयाँ मापदण्ड लागु गरेको छ । मापदण्डअनुसार फिल्ममा नग्नता र अन्तरंग दृश्यको छायांकन हुँदा कलाकारहरुले आफ्नो सीमा कायम गर्नुपर्नेछ ।
बीबीसीमा प्रकाशित समाचारअनुसार फिल्म ‘लुथर’ अभिनेत्री रुथ विल्सनसहित अन्य अभिनेत्रीहरुले यो मापदण्डको स्वागत गरेका छन् । ‘जोकोही पनि काम गर्दा सुरक्षा चाहन्छन् । यो मापदण्डले त्यो सुरक्षालाई व्यवहारमा लागु गराउन ठूलो भूमिका खेल्नेछ’, उनले भनेकी छन् ।
टाइम्स अप सन् २०१८ मा स्थापित अभियान हो । यो अभियानमा मनोरञ्जन उद्योगका सोन्डा राइम्स, नाटाली पोर्टमेन र अमेरिका फेरारा जस्ता स्टार छन् । उनीहरुले मनोरञ्जन उद्योगमा हुने यौन दुराचारविरुद्ध आवाज उठाउने जनाएका छन् ।
यो अभियानले कलाकारहरुले अडिसन वा सुटिङमा नग्न, अन्तरंग र यौन दृश्य खिच्दा उनीहरुको अधिकारको विषयमा आवाज उठाउने गर्दछ ।
मापदण्डले कलाकारले फिल्मका लागि सम्झौता गर्दा फिल्ममा शरीरको कुन अंगमा छुनुपर्ने वा देखाउनुपर्ने भन्ने प्रष्ट उल्लेख गर्नुपर्ने सीमा तोकेको छ ।
फिल्ममा ‘बडी डबल्स’ दृश्य दिनुपर्ने अवस्थामा आए कलाकारले त्यसलाई अस्वीकार गर्ने वा ‘भिटो’ गर्न पाउने प्रावधान मापदण्डमा राखिएको छ ।
