काठमाडौंसहितका सहरमा शैक्षिक संस्था तीन साता बन्द गर्न सिफारिस

काठमाडौं । तीव्ररुपमा वृद्धि भइरहेको कोरोना भाइरसको संक्रमण नियन्त्रणका लागि तीन साता शैक्षिक संस्था बन्द गर्न मन्त्रिपरिषद्‌समक्ष सिफारिस गरिएको छ कोभिड–१९ संकट व्यवस्थापन केन्द्र (सीसीएमसी)को शनिबार बसेको बैठकले कोरोना संक्रमणको दोस्रो लहर फैलिन सक्ने भन्दै तीन साता शैक्षिक संस्था बन्द गर्न सिफारिस गरेको हो ।

उक्त बैठकले वैकल्पिक माध्यमबाट कक्षा सञ्‍चालन गर्न सुझाएको छ । मन्त्रिपरिषद्‌ले निर्णय गरेपछि तीन साताका लागि शैक्षिक संस्था बन्द हुने भएका छन् ।

बैठकपछि पत्रकारहरुसँग संक्षिप्त कुराकानी गर्दै प्रधानमन्त्री तथा मन्त्रिपरिषद्का सचिव खगराज बरालले बैठकमा अहिलेको संक्रमणको स्थिति र तयारीबारे छलफल भई आमरुपमा सतर्कता अपनाउन अपील गर्ने निर्णय भएकोसमेत बताएका छन् ।

सीमा नाकाहरुमा सञ्चालनमा आएका हेल्थ डेस्कहरुलाई थप प्रभावकारी बनाउने, एन्टिजेन टेष्टलाई बढाउने, कोभिड संक्रमण भई लक्षण देखा परेका बिरामीलाई अस्पताल भर्ना गर्ने र लक्षण नदेखिएकालाई क्वारेन्टाइनमा राख्ने निर्णय पनि बैठकले गरेको छ । यसबाहेक कुनै पनि क्षेत्रबाट स्वास्थ्य मापदण्ड पालना नभई अटेरी रुपमा सञ्चालनमा आएको पाइए कडा कदम चाल्नुपर्ने अवस्था आउन सक्ने पनि सचिव बरालले बताए ।

पछिल्लो २४ घण्टामा देशभर ३३७ कोरोना भाइरस संक्रमित फेला परेका छन् । छिमेकी मुलुक भारतसहितका देशहरुमा कोरोना संक्रमितको संख्या बढ्न थालेपछि नेपाल पनि जोखिममा परेको हो ।

नेपालमा कोरोनाको यूके भेरियन्ट देखा परेपछि संक्रमणको जोखिम बढेको विज्ञहरुले बताएका छन् ।