कांग्रेसले फेरि परिमार्जन गर्यो क्रियाशील सदस्यता नवीकरण र वितरणको समयावधि
काठमाडौं । नेपाली कांग्रेसले क्रियाशील सदस्यता नवीकरण र वितरणको विवरण ‘इन्ट्री गर्ने समायवाधि फेरि परिमार्जन गरेको छ । केन्द्रीय कार्यालय सानेपामा सोमबार बसेको केन्द्रीय कार्यसमिति बैठकले क्रियाशील सदस्यता नवीकरण र वितरणको विवरण ‘इन्ट्री गर्ने समायवाधि फेरि परिमार्जन गरेको हो ।
निर्धारित समयावधि भित्र जिल्लाहरुबाट क्रियाशील सदस्यहरूको पूर्ण विवरण केन्द्रीय कार्यालयमा नपुगेका कारण महाधिवेशन कार्यतालिका हेरफेर गरिएको कांग्रेसले जनाएको छ ।
महाधिवेशनको कार्यतालिका तय गर्न केही महिना अघि बसेको कांग्रेस केन्द्रीय कार्यसमिति बैठकले चैत १० गतेसम्म क्रियाशील सदस्यता नवीकरण र वितरणको कार्य सम्पन्न गरिसक्नुपर्ने निर्णय गरेको थियो ।
तोकिएको समयावधिभित्र क्रियाशील सदस्यता नवीकरण र वितरणको कार्य सम्पन्न नभएपछि चैत २० गते बसेको केन्द्रीय कार्यसमिति बैठकले चैत ३० गतेसम्म क्रियाशील सदस्यता वितरण र नवीकरणको काम सम्पन्न गर्ने कार्यतालिका बनाएको थियो ।
आइतबार बसेको बैठकले अब वैशाख १५ गतेभित्र सबै क्रियाशील सदस्यहरुको विवरण ‘इन्ट्री’ गरिसक्नु पर्ने केन्द्रीय क्रियाशील सदस्यता छानविन समितिका संयोजक रमेश लेखकले जानकारी दिएका छन् ।
“१५ गते राति १२ बजे कम्प्युटरमा सिस्टम बन्द हुन्छ । त्यसपछि रोकिन्छ । यसपछि इन्ट्री हुन सक्दैन,” बैठक पछि आयोजित पत्रकार सम्मेलनमा समितिका संयोजक लेखकले भने ।
कांग्रेसले अन्य जिल्लाले वैशाख १५ मा क्रियाशील सदस्यहरुको विवरण ‘इन्ट्री’ गरिसक्नुपर्ने भए पनि सप्तरी, सिन्धुपाल्चोक, बारा र सोलुखुम्बुलाई वैशाख ३० सम्मको सुविधा दिएको छ ।
संयोजक लेखकअनुसार सोमबार दिउँसो २ बजेसम्म छ लाख पाँच हजार चार सय तीन जना क्रियाशील सदस्यहरुको विवरण सूचीकृत गरिएको छ । जसमध्ये तीन लाख १९ हजार तीन सय ३५ जनाको सदस्यता नवीकरण गरिएको हो भने दुई लाख ८६ हजार ६८ जना नयाँ क्रियाशील सदस्य थपिएका हुन् ।
