अक्सिजनका खाली सिलिन्डर अस्पतालमा दिनुहोस् : स्वास्थ्य मन्त्रालय

काठमाडौं । स्वास्थ्य तथा जनसङ्ख्या मन्त्रालयले खाली प्राणवायु (अक्सिजन) को खाली सिलिन्डर अस्पताललाई उपलब्ध गराउन आह्वान गरेको छ ।

मन्त्रालयको अनुगमनका क्रममा धेरै खाली सिलिन्डर आफैँ राखेको पाइएकाले यस्ता खाली सिलिन्डर अस्पतालमा कोभिड–१९ संक्रमितको उपचारका लागि उपलब्ध गराउन अनुरोध गरेको हो ।

मन्त्रालयका सहप्रवक्ता डा. समिरकुमार अधिकारीले अनुगमनका क्रममा धेरैले खाली सिलिन्डर राख्ने र भरेर पनि भण्डारण गरेर राख्ने भएकाले उद्योग व्यवसायी र सरोकारवालाले त्यस्ता सिलिन्डर अस्पताललाई उपलब्ध गराउन अनुरोध गरेका हुन् ।

अक्सिजन सिलिण्डरको संख्या ६ हजार २८८ रहेको र दैनिक एक हजार ४११.५ लिटर खपत भइरहेको जनाइएको छ । उनले धेरैभन्दा धेरै सिलिन्डर भरी नागरिकको ज्यान बचाउनका लागि अस्पताललाई उपलब्ध गराउन आग्रह गरेका हुन् ।

मन्त्रालयले अनुगमन गर्दा खाली र भरेर भण्डारण गरेको पाएमा संक्रामक रोग ऐन २०२० को आधारमा कारवाही गर्ने जनाएको छ ।

उनले सङ्क्रमितको उपचारका लागि अत्यावश्यक पर्ने अक्सिजन तथा सिलिन्डर अझै पनि सरकारको निर्णयविपरीत धेरै उद्योगधन्दामा प्रयोग भइरहेको जनाएका छन् ।