जन्डिसका बिरामीले जस्तै जता पनि पहेँलो देख्ने प्रवृत्ति देखा पर्यो: प्रधानमन्त्री ओली
प्रधानमन्त्री केपी शर्मा ओलीले मुलुकको राजनीतिमा जन्डिसका बिरामीले जस्तो जता पनि पहेँलो देख्ने प्रवृत्ति देखा परेको बताएका छन् ।
शुक्रबार सिंहदरबारमा प्रधानमन्त्रीको पदभार ग्रहणपछि बसेको मन्त्रिपरिषद्को बैठकलाई सम्बोधन गर्दै प्रधानमन्त्री ओलीले जन्डिसका बिरामीले जता पनि पहेँलो देखेजस्तै सबैतिर भ्रष्टाचार देख्ने र काम गर्नेलाई हतोत्साही गर्ने काम भएको बताएका हुन् ।
‘कोभिड–१९ का विरुद्ध एकजुट भएर लड्नुपर्ने बेलामा विभिन्न प्रकारले अस्वस्थ्य, अनुचित र तनावग्रत वातावरण बनाउने र जनतामा अन्योल सिर्जना गर्ने, निरासा पैदा गर्ने, सरकारका प्रयासहरुलाई ओझेलमा पार्न खोज्ने, प्रयासहरुलाई असफल पार्न खोज्ने , उचित प्रयासहरुलाई भ्रमपूर्ण ढंगले प्रचार गर्ने र जन्डिसको बिरामीले जस्तो जता पनि पहेँलो देख्ने, जता पनि भ्रष्टाचार देख्ने र काम गर्ने संस्था र व्यक्तिलाई पनि काम गर्न हतोत्साहित गर्ने प्रवृत्तिहरु देखा परेका छन्,’ उनले भने ।
उनले विरोधीहरुले सरकारका उचित प्रयासहरुलाई भ्रमपूर्ण ढंगले प्रचार गरी जनतामा अन्योल सिर्जना गर्ने काम गरेको बताए । उनले कोभिड १९ संक्रमणको भयावह अवस्थामा त्यसविरुद्धको लडाइँमा एकजुट हुनुपर्नेमा सरकारका प्रयासलाई ओझेल पार्ने र जनतामा निरासा पैदा गर्ने काम भएको दाबी गरे ।
नेपाली कांग्रेस, नेकपा माओवादी केन्द्र र जसपाका अध्यक्ष उपेन्द्र यादवप्रति कटाक्ष गर्दै प्रधानमन्त्री ओलीले आफूले सरकार बनाउन नसकेपछि देशमा प्रतिमन भएको देख्ने गरेको टिप्पणी गरे ।
