काठमाडौं । कोरोनालाई जितेर हस्पिटलबाट घर फर्किनेको दर झापाको बिर्तामोडस्थित बिएण्डसी हस्पिटलमा उच्च छ ।
दक्ष स्वास्थ्यकर्मी, आधुनिक भौतिक पूर्वाधार र अत्याधुनिक उपकरणको विशिष्टिकृत सेवा हस्पिटलमा रहेकाले जटिल संक्रमितका मृत्युदर अत्यन्त न्यून रहेको दाबी हस्पिटलको छ ।

अहिले हस्पिटलमा प्रदेश १ र प्रदेश २ सहित ‘हवाई बेड लिफ्ट’ गरी ल्याइएका काठमाडौं, सोलुखुम्बु, ओखलढुङ्गा, पर्सा, चितवन, कास्की, बाँके, मुगु, डोटी र कैलाली लगायतका जिल्लाका संक्रमित उपचाररत रहेको हस्पिटलले जनाएको छ ।

महङ्गो ‘हवाई लिफ्ट’ गरी हस्पिटलमा २२ जटिल संक्रमितले सेवा लिइराखेका छन् । पछिल्लो समय काठमाडौंसहित विभिन्न जिल्लामा भेन्टिलेटर, सघन उपचार कक्ष (आइसियु) तथा अक्सिजनका चरम अभाव हुन थालेपछि संक्रमित बिएण्डसीमा उपचारार्थ जानेक्रम जारी छ । भर्ना भएका संक्रमितका स्वास्थ्यावस्था सुधारोन्मुख, भेन्टिलेटरमुक्त र डिस्चार्ज हुने क्रम जारी भएको हस्पिटलले जनाएको छ । शनिबार मात्र ग्लोबल बैँकका निर्देशक केशव रायमाझी र उनकी पत्नी पवित्रा रायमाझी ‘हवाई लिफ्ट’ गरी हस्पिटलमा भर्ना भएको हस्पिटलले जनाएको छ ।

बिएण्डसी मेडिकल कलेज एण्ड टिचिङ हस्पिटल एण्ड रिसर्च सेन्टर प्रालिका कार्यकारी निर्देशक दुर्गाप्रसाद प्रसाईंद्वारा आज जारी विज्ञप्तिमा कोरोनालाई जितेर बिएण्डसीबाट घर फर्किने दर उच्च र जटिल संक्रमितका मृत्युदर अत्यन्त कम रहेको जनाइएको छ । विज्ञप्तिमा भनिएको छ, ‘हस्पिटलमा कोरोनाका संक्रमितका लागि अति आवश्यक पर्ने भेन्टिलेटर,एचडियु, आइसियु तथा अक्सिजनको हालसम्म अभाव छैन । बिरामीका जीवन बचाउने ती सामग्रीको आवश्यक व्यवस्था मिलाएका छौं ।’

हस्पिटलले संक्रमितलाई उपचार गर्न हाल २०० शय्या सञ्चालनमा ल्याएको छ । ‘हवाई लिफ्ट’ गरी संक्रमित धमाधम बिएण्डसी आउने क्रम जारी रहेपछि हस्पिटलले विशेष कोभिड शय्या थपेको थियो । आवश्यकता परेमा अझै शय्या थपिने र आफ्नै अक्सिजन प्लान्ट सञ्चालनमा आउन अन्तिम तयारी भइरहेको विज्ञप्तिमा जनाइएको छ ।

विज्ञप्तिमा मौज्दात रहेका ६५ भेन्टिलेटर सहित आइसियुमध्ये गम्भीर संक्रमितका लागि छुट्याइएको र ६० चिकित्सकसहित आवश्यक स्वास्थ्यकर्मी तयारी अवस्थामा रहेको उल्लेख छ ।

अहिले पूर्वाञ्चल क्यान्सर हस्पिटल र बिएण्डसी हस्पिटलमा गरी कुल ९०० शय्या छन् । ‘महामारीसँग जुध्न ‘र्‍यापिड रेस्पोन्स टिम’ सक्रिय छ । हस्पिटल आउने संक्रमित वृद्धि भएमा आवश्यक परे सबै शय्या उपचारमा लगाउन सकिन्छ । यसका लागि राज्यले सहजीकरण गर्नुपर्छ । उपचारको अभावमा बिरामीले अकालमा मृत्युवरण गर्न नपारोस् भन्ने नै हस्पिटलको ध्येय रहेको छ,’ कार्यकारी निर्देशक प्रसाईंले भन्नुभयो ।

विशेष गरी कोभिडका बिरामीलाई क्रिटिकल केयर र एनेस्थेसियाका वरिष्ठ चिकित्सक राजिव श्रेष्ठ, फिजिसियन चिकित्सकद्वय लक्ष्मण ठाकुर र करुण पोखरेल तथा अर्थोका इन्साक खान लगायतले सेवा प्रदान गरिरहेको हस्पिटलले जनाएको छ ।