चौधरी फाउन्डेसनले अक्सिजन प्लान्ट स्थापना गर्ने

काठमाडौं । देशभर अक्सिजन अभाव हुदै गएपछि चौधरी फाउन्डेसनले सुर्खेत, धनगढी र बीर अस्पातालमा अक्सिजन प्लान्ट स्थापना गर्ने बताएको छ। फाउन्डेसनले अक्सिजन स्थापनाको लागी आवश्यक सहमतिको काम भइसकेको भन्दै केही दिनभित्रै आयात गर्ने जनाइएको छ ।

स्थापना गरिने अक्सिजन प्लान्टको क्षमता ५० क्युविक लिटरप्रति घण्टा रहने बताइएको छ । एक दिनमा ४० लिटर क्षमताका १ सय ५० सिलिन्डर अक्सिजन भर्न सकिने बताइएको छ। अक्सिजन प्लान्ट स्थापनाका लागि चौधरी फाउन्डेसनले आफ्ना साझेदार एवं स्थानीय नगरपालिकाहरूसँग सहकार्य गर्ने जनाएको छ।

सुर्खेतमा स्थापना हुने अक्सिजन प्लान्टले प्रदेशको अक्सिजन माग पूरा गर्ने अपेक्षा गरिएको छ। फाउन्डेसनले सुर्खेत सहित बीर अस्पतालमा १८ शैयाको अत्याधुनिक आईसीयू र सुदूरपश्चिम प्रदेशको धनगढीमा पनि अक्सिजन प्लान्ट स्थापना गर्ने बताएको छ।

चौधरी फाउन्डेसनका अध्यक्ष विनोद चौधरीले कोरोना महामारीले देशभरका नागरिकलाई आक्रान्त बनाएको र यसको नियन्त्रणका लागि आपतकालीन स्वास्थ्य व्यवस्थापन अत्यन्तै जरुरी देखिएकाले फाउन्डेसनले एकीकृत योजना अगाडि सारेको बताए ।