अझै केही साता चुनौतीपूर्ण : स्वास्थ्य मन्त्रालय

काठमाडौं । स्वास्थ्य तथा जनसंख्या मन्त्रालयले अझै केही साता चुनौतिपूर्ण रहेकाले सबैजनालाई संयमित हुन आग्रह गरेको छ । सोमबार विज्ञप्ति जारी गर्दै मन्त्रालयले संक्रमण बढी भएका २० भन्दा बढी जिल्लामा संक्रमितहरू खुलेआम रुपमा हिँडिरहेकाले अझै केही साता चुनौतिपूर्ण रहेको जनाएको हो ।

स्वास्थ्य मन्त्रालयका अनुसार काठमाडौं, रुपन्देही, ललितपुर, भक्तपुर, मोरङ, कैलाली, कास्की, बाँके, दाङ, चितवन, सुर्खेत, झापा, कञ्चनपुर, मकवानपुर, धनुषा, काभ्रेपलाञ्चोक, सुनसरी, पर्सा, बर्दिया, पाल्पालगायतका जिल्लाहरूमा संक्रमणदर बढी भएपनि संक्रमितहरू सार्वजनिक स्थानमा खुलेआम हिँडिरहेका छन् ।

यसरी खुलेआम रुपमा संक्रमितहरू हिँड्दा संक्रमण नियन्त्रण गर्न चुनौती थपिएको मन्त्रालयले जनाएको छ।

यस्तै, अध्ययनहरुले अझै पनि जनस्वस्थ्यका मापदण्डहरुको राम्ररी पालना नभइरहेको र निषेधाज्ञाको समयमा पनि मानिसहरुको आवतजावतमा ५९ प्रतिशतमात्रै कमी भइरहेको पाइएको जनाएको छ ।

मन्त्रालय र अग्रपंक्तिमा रहेका स्वास्थ्यकर्मीले मात्र चाहेर महामारी नियन्त्रण नहुने भन्दै अन्य मन्त्रालय, प्रदेश र स्थानीय तहका सबै सरकारी निकायहरुको पनि महत्वपूर्ण भूमिका रहने मन्त्रालयले जनाएको छ ।