महामारीमा मध्यावधि चुनाव गर्ने कि जनताको स्वास्थ्यमा ध्यान दिने ? : रामकुमारी झाँक्री

काठमाडौँ– नेकपा एमालेकी नेता रामकुमारी झाँक्रीले राष्ट्रपति विद्यादेवी भण्डारीले संविधानको धारा ७६ (५) बमोजिम प्रधानमन्त्री नियुक्त गर्न प्रतिनिधिसभामा विश्वासको मत प्राप्त गर्न सक्ने आधार पेश गर्न गरेको आह्वानको विरोध गरेकी छन् ।

उनले सामाजिक सञ्जाल फेसबुकमार्फत राष्ट्रपतिले नयाँ सरकार गठनका लागि गरेको आह्वानको विरोध गरेकी हुन् ।

‘संबिधानको धारा ७६(३) को प्रधानमन्त्रीले ३० दिन भित्र अनिवार्य ७६(४) अनुसार विश्वासको मत लिनुपर्छ । यदि प्रधानमन्त्रीलाई संसदले विश्वासको मत दिन्न भन्ने लाग्छ भने प्रधानमन्त्री पदबाट राजिनामा दिनुपर्छ । र बल्ल अर्को सरकार बन्ने आधार बन्छ । एउटा प्रधानमन्त्री हुँदाहुँदै अर्को सरकारको आह्वान गर्नु राष्ट्रपतिले पदीय मर्यादा कायम गर्न नसक्नु हो, संबिधानको उल्लंघन हो । संबिधानको व्यवस्था कुल्चने अधिकार न राष्ट्रपतिलाई छ न प्रधानमन्त्रीलाई । हाम्रो देशको राष्ट्रप्रमुख संबिधानको संरक्षक र कानुनको परिपालक हो ।’ झाक्रीले फेसबुकमा लेखेकी छन्, ‘ संसदबाट अर्को सरकार बन्ने अवसर समेत नदिई मिलेमतोमा संसद विघटन र मध्यावधि चुनाव गर्न चाहने प्रधानमन्त्रीको कदम यो महामारीमा खोप, अस्पताल, औषधि, बेड, अक्सिजन, ICU, Ventilator, नपाएका जनताको पिडा कहाँ जोडिन्छ ? महामारीमा मध्यावधि चुनाव गर्ने हो कि ? जनताको स्वास्थ्यमा ध्यान दिने हो ? जवाफदेही हुनुपर्दैन ?