गठबन्धनबाट प्रस्तावित प्रधानमन्त्रीको पक्षमा हस्ताक्षर नगरेका नेकपा (एमाले)का नेता योगेश भट्टराईले आजको दिनलाई आफ्नो जीवनको सबैभन्दा कठिन दिन भएको बताएका छन् ।

राष्ट्रपति विद्यादेवी भण्डारीले प्रधानमन्त्री नियुक्तिका दाबी पेस गर्न आह्वान गरेपछि विपक्षी गठबन्धनले नेपाली कांग्रेसका सभापति शेरबहादुर देउवाले दाबी पेस गर्न हस्ताक्षर संकलन गर्दा एमालेका माधवकुमार नेपाल पक्षका २६ जना सांसदले हस्ताक्षर गरे । तर, नेपाल पक्षकै भए पनि भट्टराईले हस्ताक्षर गरेनन् ।

उनले उक्त निर्णय एमालेको एकतालाई जोगाउने आसले लिएको बताएका छन् । ‘मेरो राजनीतिक जीवनकै सबैभन्दा कठिन दिन आज । नेकपा (एमाले)को एकतालाई जोगाउन सकिन्छ कि भन्ने आशाले मैले आजको निर्णय लिएको हुँ । सही गरेँकी, गलत गरेँ इतिहासको कठोर मूल्यांकनमा खडा छु,’ भट्टराईले सामाजिक सञ्जालमा लेखेका छन् ।