काठमाडौं । उपत्यकाका तीन जिल्लामा जारी निषेधाज्ञा पुनः एक साता थप गर्दै २० जेठसम्म पुर्‍याइएको छ । उपत्यकाका तीनै जिल्लाका प्रमुख जिल्ला अधिकारीहरूको आज बसेको भर्चुअल बैठकले जारी निषेधाज्ञालाई एक हप्ता थप गर्ने निर्णय गरेको हो ।

काठमाडौंका प्रमुख जिल्ला अधिकारी कालीप्रसाद पराजुलीले निषेधाज्ञा एक हप्ता थप गर्ने निर्णय भएको जानकारी दिए उनका अनुसार अब निषेधाज्ञामा किराना पसलसमेत खोल्न नपाइने भएको छ । कोरोना सङ्क्रमणको दर कम नभएपछि यस्तो निर्णय गरिएको उनले जानकारी दिए ।

‘जारी निषेधाज्ञालाई एक साता थप गर्ने निर्णय भयो, अब किराना पसल पनि खोल्न पाइने छैन,’ काठमाडौंका प्रमुख जिल्ला अधिकारी पराजुलीले भने । तर तरकारी तथा दूधजन्य पदार्थका पसल भने सञ्चालनमा रोक लगाएको छैन । यस्ता पसल विहान ९ बजेसम्म खोल्न पाइने छ ।

कोरोनाको दोस्रो लहरको संक्रमण बढ्दै गएपछि काठमाडौंसहित भक्तपुर र ललितपुर गरी उपत्यकाका तीनै जिल्लामा १६ वैशाखदेखि निषेधाज्ञा निरन्तर छ । यसअघि ३० बैशाखमा निषेधाज्ञा थप गर्दै दुई साता बढाइएको थियो भने त्यसअघि २२ वैशाखमा एक साता थप गरिएको थियो । पछिल्लो पटक थप भएको निषेधाज्ञा १३ जेठसम्म तोकिएको छ ।

पछिल्लो पटक सरकारले कोभिड-१९ अध्यादेश ल्याएपछि प्रशासनले निषेधाज्ञाको कार्यान्वयनमा कडाइसमेत गरेको छ । अध्यादेशमा अनुमतिविना वा बिरामी ओसारपसार गर्ने प्रायोजनबाहेक सवारीसाधन चलाएर कारबाही गर्नसक्ने व्यवस्था छ । त्यस्तो अवस्थामा दुईपांग्रेलाई दुई हजार र अन्य सवारीसाधनलाई ५ हजारसम्म जरिवाना लिन सकिने जिल्ला प्रसासन कार्यालय काठमाडौंद्धारा जारी सूचनामा उल्लेख छ ।

यस्तै मास्क नलगाइ सार्वजनिक स्थलमा आवतजावत गर्नेलाई पनि पटकैपिच्छे एक सय रुपैयाँ तिराउन सक्ने अध्यादेशमा उल्लेख छ भने हिंडडुलमा रोक लगाएको अवस्थामा विना काम निस्किनेलाई दुई सय रुपैयाँ जरिवाना गराउन सकिने उल्लेख छ ।