पार्टी एकताका लागि तार्किक निष्कर्षमा पुग्न अध्यक्ष ओलीको वक्तव्य सकारात्मक : नेता भट्टराई

काठमाडौँ– नेकपा एमालेका नेता योगेश भट्टराइले अध्यक्ष केपी शर्मा ओलीले पार्टी एकताका लागि गरेको आह्वान सकारात्मक भएको प्रतिक्रिया जनाएका छन् ।

अध्यक्ष ओलीले एकताको आह्वानसहित ६ बुँदे अपिल जारी गरे लगत्तै उनले सामाजिक सञ्जालमार्फत सो प्रतिक्रिया जनाएका हुन् ।

एमालेको नेपाल–खनाल समूहमा रहेका उनले प्रधानमन्त्री समेत रहेका ओलीको आह्वानले एमालेको एकतालाई अक्षुण राख्न मद्धत पुग्ने अपेक्षा राखेका छन् ।

‘कार्यदल स्तरको छलफललाई यो बक्तब्यले पुनः निरन्तरता दिन बाटो खुलेको छ । पार्टीका जिम्मेवार नेता कमरेडहरु सम्मिलित कार्यदलले स्पस्ट गर्नुपर्ने र मिलाउनु पर्ने थप विषयहरुलाई समाधान गर्ने छ’, उनले फेसबुकमा लेखेका छन्, ‘सर्वोच्चमा विचाराधीन विषयमा सबै सम्भावनालाई ख्याल गर्दै र मुलत संविधानको रक्षा, लोकतान्त्रिक प्रकृयाको निरन्तरता र पार्टी एकताको खातिर एउटा तार्किक निष्कर्षमा पुग्नु उपयुक्त हुनेछ ।’

उनले ओलीको वक्तव्यले पार्टीको शीर्ष नेतृत्वका बीचमा सार्थक संबाद हुने र नेकपा एमालेको एकतालाई अक्षुण राख्न मद्घत पुग्ने बताएका छन् ।