कोरोनाका कारण मिल्खा सिंहको निधन
५ असार २०७८, शनिबार ०३:४८
भारतका चर्चित धावक मिल्खा सिंहको निधन भएको छ । कोरोनाभाइरस संक्रमण भएपछि उनी केही दिनअघि भारतको चण्डीगढस्थित अस्पतालमा भर्ना भएका थिए ।
९१ वर्षका मिल्खा सिंह भारतका चर्चित धावक हुन् ।
३ जुनमा नै उनलाई कोरोनाभाइरस संक्रमण भएको थियो । तर, १३ जुनमा उनको कोरोना रिपोर्ट नेगेटिभ आएको थियो । पाँच दिन अघि मात्र उनकी पत्नी निर्मल मिल्खा सिंहको पनि कोरोनाका कारण निधन भएको थियो ।
फ्लाइङ सिखको नामबाट पनि चिनिने मिल्खा सिंह भारतका एक मात्र त्यस्ता धावक हुन् जसले एशियाली खेलका साथसाथै कमनवेल्थ खेलमा पनि स्वर्ण पदक जितेका थिए ।
उनको निधनमा भारतीय प्रधानमन्त्री नरेन्द्र मोदीले ट्विट गर्दै दुःख जनाएका छन् ।
