काठमाडौं उपत्यकामा जारी निषेधाज्ञा एक साता थपियाे, निजी सवारीमा जाेर-बिजाेर


काठमाडौं । काठमाडौं उपत्यकामा जारी निषेधाज्ञा थप एकसाता लम्बाइएको छ । कोभिड-१९ संक्रमण रोकथामका लागि आइतबार बसेको काठमाडौं उपत्यकाका तीनै जिल्ला प्रशासन कार्यालयहरुको संयुक्त बैठकले उक्त निर्णय गरेको हुन् । थप गरिएको निषेधाज्ञा असार १४ गते मध्यरातसम्म लागु हुनेछ ।

काठमाडौं, भक्तपुर र ललितपुरमा भाइरस संक्रमण उल्लेखनीयरुपमा नघटेको निष्कर्ष निकाल्दै जारी निषेधाज्ञालाई थप गरिएको ललितपुरका प्रमुख जिल्ला अधिकारी ढुण्डीप्रसाद निराैलाले जानकारी दिए ।

थपिएको निषेधाज्ञा अवधिमा थप केही क्षेत्र खुकुलो बनाइएकाे छ । थप निषेधाज्ञामा निजी सवारी-साधनमा जाेर-बिजाेर प्रणालीअन्तर्गत चलाउन दिइनेछ ।

त्यस्तै पसल बार अनुसार खाेल्न दिइने प्रमुख जिल्ला अधिकारी निराैलाले जानकारी दिए । निजी सवारीमा यात्रा गर्दा बढीमा ४ जनालाई अनुमति दिइने ललितपुरका सीडीओ निरौलाले जानकारी दिए । यस्तै, मोटरसाइकलमा दुई जनाले यात्रा गर्न सक्ने छन् ।

अब दुई पाङ्ग्रे मोटरसाइकल र निजी चार पाङ्ग्रे कार, जीप, ट्याक्सी जोर–बिजोरका आधारमा चल्नेछन् । त्यस्तै हार्डवेयर पसल बिहान ११ बजेदेखि बेलुका ६ बजेसम्म खुल्ने छन् ।

सुनचाँदी, भाडा पसल आइतबार, मंगलबार र बिहीबार तथा कपडा पसल, डिमार्टमेन्टल स्टोर तथा खेलकुदका पसल सोमबार, बुधबार र शुक्रबार खुल्ने प्रमुख जिल्ला अधिकारी निरौलाले जानकारी दिए ।


Loading comments...