Lifestyle Portal
  •   ७ कार्तिक २०७८, आईतवार

बादलसहित पूर्वमाओवादी नेताको जिम्मेवारी फेरिँदै

९ भाद्र २०७८, बुधबार १०:०७

काठमाडौँ, ९ भदौ

दश बुँदे सहमति कार्यान्वयन सुरु भएसँगै नेकपा विभाजनपछि एमालेमा लागेका रामबहादुर थापा ‘बादल’सहित पूर्वमाओवादी समूहका नेताहरूको जिम्मेवारी हेरफेर हुने भएको छ ।

एमालेको केन्द्रदेखि वडा तहसम्मको संरचना २ जेठ २०७५ को सांगठनिक संरचनामा फर्किएका कारण बादलसहित पूर्वमाओवादी नेताहरूले पाएको जिम्मेवारीमा पनि फेरबदल हुने निश्चित भएको हो ।

स्थायी कमिटी सदस्य किरण गुरुङले एमालेमा नेता-कार्यकर्ताले पूर्वअवस्थाको जिम्मेवारी पाउने निश्चित भएकाले पार्टी विभाजनपछि एमालेमै रहेका पूर्वमाओवादीका नेताहरूको जिम्मेवारीमा हेरफेर गरिने बताए । एमालेमै रहेका उनीहरूलाई सम्मानजनक रूपमा नयाँ जिम्मेवारी दिइनेछ ।

‘अब प्रदेश समन्वय कमिटी पूर्ववत रुपमा (तत्कालीन एमालेको) संयोजक र सहसंयोजक रहेको संरचनामा फर्किन्छ, त्यसपछि आवश्यकताका आधारमा पार्टीले इन्चार्ज, सहइन्चार्ज राख्ने कि नराख्ने नयाँ निर्णय गर्छ,’ गुरुङले भने, ‘जिल्लाको हकमा पनि पूर्ववत संरचनाबाटै पार्टी क्रियाशील हुन्छ तर विभाजनतिर लागेर रिक्त हुने स्थानमा नयाँ निर्णय हुनेछन् ।’

एमालेको संस्थापन पक्षले पार्टी विभाजनपछि एमालेमा लागेका बादललाई बागमती, लेखराज भट्टलाई सुदूरपश्चिम इन्चार्ज बनाएको थियो । त्यस्तै, टोपबहादुर रायमाझीलाई मोर्चाफाँट इन्चार्ज, प्रभु साहलाई प्रदेश २ को संयोजक तथा मणि थापालाई सांस्कृतिक फाँट इन्चार्ज बनाएको थियो ।

सचिव भीम आचार्यले दश बुँदे सहमति कार्यान्वयन गर्ने निर्णयसँगै नेकपाको विभाजन र एमाले ब्यूँतिएपछि एकलौटी रूपमा गरिएका सवै निर्णयलाई प्रतिस्थापन गरेको बताए । ‘यसअघिका सबै निर्णय प्रतिस्थापित भएको छ, अब आवश्यकताको सिद्धान्तअनुसार नयाँ निर्णय हुनेछन्,’ उनले भने ।

त्यस्तै, दश बुँदे सहमतिअनुसार १० प्रतिशत नयाँ केन्द्रीय सदस्य थपिनेछन् । केन्द्रीय सदस्य थप्ने, केन्द्रीय निकाय र विभागलाई पूर्णता दिन तथा आवश्यकताअनुरूप पुनर्गठनका लागि स्थायी समितिले ६ सदस्यीय कार्यदल गठन गरेको छ । कार्यदलमा उपाध्यक्ष भीमबहादुर रावल, महासचिव ईश्वर पोखरेल, उपमहासचिव विष्णु पौडेल र घनश्याम भूषाल तथा स्थायी समिति सदस्यहरु सुरेन्द्र पाण्डे र लेखराज भट्ट सदस्य तोकिएका छन् ।

बैठकले २३ फागुनयता संस्थापन पक्षले गरेको एकलौटी निर्णय प्रतिस्थापन गर्दै महाधिवेशन तयारीसम्बन्धि सबै निर्णय फेरबदल गरेको छ । जसअनुसार यसअघि २७ र २८ भदौका लागि तोकिएको विधान महाधिवेशन असोजको ४, ५ र ६ गते गर्ने निर्णय गरिएको छ ।

त्यस्तै, आगामी ४ र ५ मंसिरका लागि तोकिएको दशौं महाधिवेशन १०, ११ र १२ मंसिरमा गर्ने निर्णय स्थायी कमिटी गरेको छ । असोज पहिलो साता तोकिएको वडा र पालिका तहको अधिवेशन ६ र ८ कात्तिकमा गर्ने निर्णय भएको छ ।

प्रतिक्रिया दिनुहोस !
Loading comments...
सम्बन्धित खबरहरु

आर्थिक महामन्दीले कुनै एक देश वा विश्वको कुनै एक क्षेत्रलाई प्रभावित गर्छ। त्यस देश वा क्षेत्रको अर्थतन्त्रलाई सुस्त पार्छ। त्यहाँका

भारत सरकारको सहयोगमा निर्माण भएको जयनगर–कुर्था सीमापार रेलमार्ग भारतले एक समारोहबीच आज नेपाल सरकारलाई हस्तान्तरण गरेको छ । उक्त समारोहमा

मोरङ । धनपालथान गाउँपालिका-४ स्थित कर्सियाको बिपि चोकमा रहेको सिटिजन बैंकबाट गत असोज २५ गते नगद लुटपाट भएको घटनामा संलग्न

हाल भारतको बिहार र उत्तर प्रदेश आसपास रहेका न्यून चापिय प्रणालीहरु र पश्चिमी वायु प्रणालीको संयुक्त प्रभाव नेपालमा रहेको छ