Lifestyle Portal
  •   ३० आश्विन २०७८, शनिबार

नेपाल-भारत फुटबल : दर्शकविहीन खेल हुने सम्भावना

१६ भाद्र २०७८, बुधबार ०७:२७

लोकप्रिय

रमेश सुवेदी/न्युजकारखाना

काठमाण्डौ । नेपाल र भारतबीचको दुई मैत्रीपूर्ण फुटबल खेल दर्शकविहीन हुने सम्भावना बढेको छ । बिहीबार र आइतबार नेपालले भारतसँग दुई मैत्रीपूर्ण फुटबल खेल खेल्ने कार्यक्रम छ । दुवै खेल दशरथ रंगशालामा साँझ साढे ५ बजे हुने छ ।

खेल हुन दुई दिनमात्रै बाँकी हुँदासमेत दर्शकको विषयमा नेपाली फुटबलको सर्वोच्च निकाय अखिल नेपाल फुटबल संघ (एन्फा) ले ठोस निर्णय दिन सकेको छैन ।

राष्ट्रिय खेलुकद परिषद् (राखेप), खेलकुद मन्त्रालयमार्फत कोभिड–१९ संकट व्यवस्थापन केन्द्र (सिसिएमसी) मा एन्फाले पठाएको पत्रको सुनुवाइ भएको छैन । पछिल्लो समय एन्फाले कोभिडरिुवद्ध खोप लगाएका दर्शक अथवा दर्शक क्षमताको २५ प्रतिशत मात्रै भए पनि राख्ने सर्तसहित सिसिएमसीमा पत्र पठाएको थियो ।

तर पछिल्लो समय सिसिएमसीको बैठक नबस्दा एन्फाको पत्र रोकिएको छ । यदि यो दुई दिनभित्र मात्रै सिसिएमसीको बैठक बसेर स्वीकृत पाएमा एन्फा दर्शक रंगशालामा प्रवेश दिने रणनीतिमा छ ।

‘दर्शकको विषयमा कुनै निर्णय भएको छैन । हामी सिसिएमसीको निर्णय कुरेर बसेका छौं,’ एन्फा अध्यक्ष कर्माछिरिङ शेर्पाले न्युज कारखानासँग भने, ‘बिहीबार बिहानसम्म पनि स्वीकृति पाए हामी दर्शकलाई प्रवेश दिनेछौं ।’

मैत्रीपूर्ण खेलका लागि ३७ सदस्यीय भारतीय टोली नेपाल सोमबार नै आइपुगेको छ । कप्तान सुनिल क्षेत्रीको कप्तानीमा गोलरक्षक गुरप्रित सिंह सन्धूसहित २५ सदस्यीय टोली छ । मुख्य प्रशिक्षक इगोर स्टिम्याकसहित १२ जना अफिसियल छन् ।

भारतीय टोली नेपाल भ्रमणमा रहँदा होटल सोल्टी प्लाजामा बस्नेछ । उसको तयारी भने दशरथ रंगशाला, एन्फा मैदान तथा आर्मीको मैदानमा हुनेछ ।

यता, करिब तीन साताको पोखरा अभ्यासपछि नेपाली टोली काठमाडौं आइपुगेको छ । प्रशिक्षक अब्दुल्लाह अल्मुताइरीले किरणकुमार लिम्बूको कप्तानीमा २५ सदस्यीय खेलाडी छनोट गरेका छन् ।

अनुभवी खेलाडीहरु भरत खवास, विक्रम लामा, रञ्जित धिमाल, अभिषेक रिजाल, जर्ज प्रिन्स कार्की, रोहित चन्द यसपटक टोली बाहिर हुनेछन् । रोहित क्याम्पमै रहे पनि इन्डोनेसियाको लिग वान सुरु हुने हुँदा गत साता आफ्नो क्लब पर्सिजा जाकर्तातर्फ पुगेका थिए । प्रशिक्षक अब्दुल्लाहले भारतविरुद्धको खेलका लागि पहिलोपटक नितिन थापा, राजन गुरुङलाई स्थान दिएका छन् ।

बुधबार बिहान ११ बजे एन्फा मुख्यालयमा खेलअघि दुवै टोलीका प्रशिक्षक र कप्तानसहित पत्रकार सम्मेलन हुनेछ ।

नेपाल र भारत दुवैले माल्दिभ्सको मालेमा १–६ अक्टोबरसम्म हुने साफ च्याम्पियनसिपको तयारीस्वरुप मैत्रीपूर्ण खेल खेल्न लागेका हुन् । पाँच टोली सहभागी प्रतियोगिता सिंगल राउन्ड रोबिनको आधारमा हुनेछ । यसपटक पाकिस्तानले फिफा प्रतिबन्धका कारण खेल्ने छैन भने कोरोना कारण देखाउँदै भुटानले नाम फिर्ता लिएको छ ।

हालसम्म नेपाल र भारतबीच १९ पटक भेट भएको छ । जसमा भारतले आफ्नो दबदबा कायम गरेको छ । भारतले १३ खेल जित्दा नेपालले दुई खेल मात्रै आफ्नो पक्षमा पारेको छ । चार खेल भने बराबरीमा समाप्त भएका छन् । भारतले ३३ र नेपालले नौ गोल गरेका छन् ।

नेपाल र भारतले पहिलो पटक २० डिसेम्बर १९८५ मा एकअर्काविरुद्ध खेलेका थिए । जुन खेल गोेलविहीन थियो । त्यसको भोलिपल्ट पुनः भिड्दा भारतले खेल २–० गोल अन्तरले आफ्नो पक्षमा पारेको थियो ।

दुई टोलीले अन्तिमपटक सन् २०१७ को जुन ६ मा भिडेका थिए । भारतको मुम्बई फुटबल एरिनामा भएको खेलमा नेपाल २–० गोल अन्तरले पराजित भएको थियो । भारतका खेलाडी सन्देश झिन्गान र जे जे लाल पेख्लुयाले नेपालविरुद्ध गोल गरेका थिए ।

नेपालले अन्तिमपटक घरेलु मैदानमा भारतसँग १७ मार्च २०१५ मा खेलेको थियो । फिफा विश्वकप छनोटका लागि भएको खेल गोलरहित बराबरीमा समाप्त भएको थियो ।

नेपाल र भारतबीचको खेलमा सर्वाधिक गोलकर्ता भारतीय टोलीका हालका कप्तान सुनिल क्षेत्री छन् । उनले आठ खेल खेल्दै पाँच गोल गरेका छन् । यस्तै, आईएम बिजयन र कार्लटन चापम्यानले समान तीन गोल गरेका छन् ।

२५ सदस्यीय नेपाली टिम
गोलरक्षक : किरणकुमार लिम्बू, दीप कार्की, विशाल श्रेष्ठ, विकेश कुथु
डिफेन्डर : अनन्त तामाङ, दिनेश राजवंशी, गौतम श्रेष्ठ, राजन गुरुङ, रोहित चन्द, सुमन अर्याल
मिडफिल्डर : आयुष घलान, अञ्जन विष्ट, विशाल राई, कमल थापा, मनिष डाँगी, नितिन थापा, पुजन उपर्कोटी, सन्तोष तामाङ, सुजन श्रेष्ठ, सुनिल बल, सुरज ठकुरी, तेज तामाङ
स्ट्राइकर : आशिष लामा, नवयुग श्रेष्ठ, सुमन लामा

भारतीय टोली
गोलरक्षक : गुरप्रीत सिंह सन्धू, धिरज सिंह मोइरङथेम, अम्रिन्दर सिंह
डिफेन्डर : राहुल भेके, आकाश मिश्रा, प्रितम कोटल, चिङलेन्साना सिंह कोन्शाम, मन्दर राव दसाई, शुभाशीष बोस, सेरिटन फर्नान्डेज
मिडफिल्डर : अनिरुद्ध थापा, लिष्टन कोलाको, यासिर मोहम्मद, ग्लेन मार्टिन्स, सुरेससिंह वाङजाम, ज्याक्सन सिंह, प्रणय हाल्डर, लालेङमाविया, विपीन सिंह
स्ट्राइकर : मन्विर सिंह, रहिम अलि, सुनिल क्षेत्री, फरुख चौधरी

प्रतिक्रिया दिनुहोस !
Loading comments...
सम्बन्धित खबरहरु

माल्दिभ्सको राष्ट्रिय फुटबल स्टेडियममा सम्पन्न साफ च्याम्पियनसीपको १३ संस्करणको उपाधीमाथी भारतले कब्जा गरेको छ । यससँगै भारतले ८औं पटक यस

भारतले ४९ तथा ५० मिनेटको समयान्तरमा गरेको दुई गोल लगत्तै नेपालका तर्फबाट चारजना खेलाडीलाई परिवर्तन गरिएको छ । नेपालका तर्फबाट

पहिलो हाफको ४९ मिनेटमा भारतका कफ्तान सुनिल क्षेत्रीले पहिलो गोल गरे भने लगत्तै मिड फिल्डर सुनिल सिंह वाङजेमले ५० औं

माल्दिभ्सको राष्ट्रिय फुटबल स्टेडियममा साफ च्याम्पियनसीपको जारी १३ संस्करणको उपाधीका लागि नेपाल तथा भारतको फाईनल खेलको पहिलो हाफ गोलरहित बराबरीमा