Lifestyle Portal
  •   २१ असार २०७९, मंगलवार

बालेन होइन बालेनहरू!

४ जेष्ठ २०७९, बुधबार ११:५४

मैले २०४७ सालपछि भोट नै हालेकी छैन । किनभने हाम्रो नेपालमा बहुदल भित्रिएपछि मुलुकमा थप व्यक्तिवाद मात्रै मौलाएको देखेपछि मलाई राजनैतिक वितृष्णा भएको हो । त्यसैले यसपल्ट पनि मैले बालेनलाई भोट हालेकी छैन । अर्थात् बालेनसँग मेरो व्यक्तिगत कुनै सरोकार छैन । तर म पनि यसै समाजमा र यसै व्रम्हाण्डसँग सरोकार राखिरहेकी मानिस भएकी हुनाले वर्तमानसँग सरोकार राखेकी हुँ । किनभने अहिलेका चेतनशील नेपाली संसारमा हरेक तीन जनामध्ये एकजनाको मुखमा ‘बालेन’ छ । अहिलेको नेपाली संसारै बालेनमय बनेको छ ।

लेखकः इन्दिरा प्रसाई

समाजिक सञ्जाल अर्थात् इन्टरनेट सुविधाका कारण संसार अहिले साँगुरो भएको छ । संसारको एक कुनाका कुनै एउटा मानिसले ङिच्च हाँसे पनि, ठुस्स परे पनि, पिच्च थुके पनि, च्वाप्प पारे पनि, अँगालो हाले पनि र लात्तले हाने पनि निमेषभरमै संसारको अर्को छेउका मानिसले देख्ने, सुन्ने वा सम्पूर्ण प्रत्यक्ष झैँ अनुभूत गरिने अद्भूत प्रविधिको विकास भएको छ । यसै फाइदाका कारण विगतमा भूस्वर्ग मानिएको वर्तमानको काठमाडौँको दुर्गन्धित खाडलको मेयरको उम्मेद्वार बनेको एकतीस वर्षे युवा बालेन अहिले नेपाली संसार प्रसिद्ध बनेका छन् ।

त्यसो त युगौँदेखि नेपाली माटोमा आश्वासनको मैनटोल बालेर थरिथरिका उम्मेद्वार त आएका नै हुन् । तर तिनले Danish लेखक Hans Christian Andersenद्वारा लेखिएको विश्व प्रसिद्ध कथा “The Emperor’s New Clothes” मा जुलाहा बनेर आएका ठग दाजुभाइले सम्राट्लाई नाङ्गै पारे झैँ नेपाली जनतालाई नाङ्गो पार्ने काम मात्र गरेका छन् ।

नेतृत्व पङ्तिमा रहेकाहरूको विगतका कुकृत्यको धङधङीले गर्दा मलाई पनि हत्तपत्त कुनै नेताको विश्वासै लागेन । वर्षौँदेखि हरेक उम्मेद्वार बनेर आउनेहरूका ठूलाठूला आदर्शका कुरा सुनेपछि यो त गतिलो होला कि भन्ठान्थ्यौँ हामी । तर परिणाम त विजयी उक्त नेताले आफ्नो र आफ्नै परिवारको भलो त गर्छ नै गर्छ, अझ धेरै जसोले जताको नुनभुटुन खाएको हो त्यतैको भलो गर्न थाल्छन् । त्यसैले नेपालका नेता भनेका ‘जुन जोगी आयो कानै चिरेको’ भने झैँ भएका छन् भन्ने सोचमैँ म पनि राजनीतिसँगै वितृष्णित भइरहेँ ।

नेपालका नेता भनाउँदासँग वाक्क र दिक्क भएका हामी काठमाडौँ वासीले अहिले विकासवादी युवा नेताका रूपमा बालेन अर्थात् बालेन्द्र शाहलाई पाएको अनुभूत गरेका छन् । यति हुँदाहुँदै पनि हामी नेपालीले युगौँदेखि भोग्नु वितण्डा भोगेर भुतुक्क भइएको कारण बालेन सन्दर्भमा पनि थरीथरीका सन्त्राशले हामीलाई घेर्नु अचम्म पनि होइन । तर अहिले बालेन शैली निकै लोकप्रिय भने भएकै हो । यिनको विकासवादी चिन्तन, कार्य र प्रस्तुतिले गर्दा नै यति बेला नेपालभित्रका के प्रौढ के युवा वा बालबालिका मात्र नभएर देश विदेशमा रहेका प्रत्येक राष्ट्रवादी नेपालीका मुखमा समेत बालेनको नाउँ झुण्डिएको छ ।

यसपटकको काठमाडौँको मेयरमा बालेनले नै जित्ने संभावना प्रबल पनि बन्दै गएको छ । चुनाव जितेपछि बालेनले अहिलेको यो उनको लोकप्रियतालाई यथार्थमा परिणत गर्ने समय आउने छ । बालेनका सामु आफूले प्रकट गरिसकेका प्रतिबद्धता पूर्ण गर्ने कार्य त छँदै छ । त्योभन्दा पनि डरलाग्दो भनेको नेपालको भ्रष्ट सरकारी तन्त्रसँग पनि उनले डटेर भिड्नु पर्ने छ । भिडेरमात्र पनि पुग्दैन उनले त्यो कुतन्त्रलाई पराजित गर्नै पर्छ ।

अहिले नै पनि बालेनलाई झण्डा ओडेको कुरामा झण्डा झुकाएको आरोप लाउँदै विवादमा तानेका छन् । बालेनले सम्मानका साथ राष्ट्रिय झण्डा ओडेको विषय झण्डा ठाडो पारेर सोही झण्डाको आडमा अनर्गल काम गर्नेहरूले नै पचाउन नसकेको देखिएको छ । अर्को कुरा दल र दलका आडमा जथाभावी गर्ने दल र दलका माध्यमबाट मुलुक र जनतालाई नै दुहुना बनाउँदै आएकाहरूले नै अनेक परिपञ्च रचेर बालेनलाई असफल गराउन जे सुकै पनि गर्न पछि पर्ने छैनन् ।

बालेन तराई मूलका हुनु र काठमाडौँ नेवा राज्य हो भनेर साम्प्रदायिक नारा पनि लगाइन थालिसकिएको छ । हाम्रो मुलुकमा राष्ट्रवादी व्यक्तिको हत्या गरिने, समुल नै नष्ट गराइने वा पङ्गु पारेर पाखा लगाउने षडयन्त्र पनि गरिँदै आएको छ । त्यसैले मेयरमा निर्वाचित भएपछि बालेनले पनि फलामका चिउरा चपाएर सतर्कतापूर्वक काम गर्नुपर्ने छ ।

बालेनको उदय अहिलेको नेपालका लागि नयाँ बिहानीको सूर्य समान भएको छ । अब बालेन एउटा नीति बनेर सम्पूर्ण नेपालभरि बालेनै बालेनको टड्कारो आवश्यकता पूरा हुनुपर्छ । हरेक युवा र हरेक नेपालीले जाग्रत भएर बालेनहरू राष्ट्रिय राजनीतिमा आउनुपर्ने छ । यो मेरो वा उसको आवश्यक्ता नभएर सम्पूर्ण नेपालको आवश्यकता हो । अबका दिनमा बालेनले नै यसको नेतृत्व गर्नुपर्छ र नेपाललाई नयाँ नेपाल बनाउनु पर्छ । त्यसो गर्दै गए भने बालेन नेपालका राष्ट्रका संरक्षकै समेत बन्न पनि सक्ने छन् । यदि नेपाल बनाउने नै हो भने दुङदुङी गन्हाएका र ढुसी परिसकेका पुराना नेता परित्याग गरेर युवाहरूले नै काँधमा नेपाल बोक्नुपर्छ ।

इमान्दार, राष्ट्रवादी, दुरदृष्टि र विकासवादी दृष्टिकोणका साथ आधुनिक सोच र सामर्थ्य भएका युवाले मात्र लथालिङ्ग भइसकेको नेपालमा सकारात्मक परिवर्तन ल्याउन सक्छन् । किनभने यतिबेला नेपाल जोगाउन संसारभरिका नेपाली युवाहरूले एक जुट हुनै पर्ने समय पनि आइसकेको छ । त्यसैले म पनि भन्छु बालेन भनेको वर्तमान नेपालको आवश्यकता हो । हाम्रो देशका हरेक अञ्चल, जिल्ला, नगर र गाउँहरूमा हामीलाई बालेनहरू चाहिएका छन् । हामीले बालेन कत‌ैबाट आयात गर्नु पर्दैन । स्वतस्फूर्त रूपमा जताततै छरिएर रहेका बालेनहरू जाग्रत हुनुपर्यो । एउटा बालेन होइन हामीलाई नेपालभरि बालेनै बालेनहरू चाहिएको छ ।

त्यसैले म भन्छु-
बालेन जितुन् !
बालेन नबिकुन् !
बालेन आफ्नो लक्ष्यमा टिकुन् !

अनि त्यसपछि बालेन- जिन्दावाद !

प्रतिक्रिया दिनुहोस !
सम्बन्धित खबरहरु

नइ प्रकाशनको प्रतिष्ठा, गरिमा र महिमाको उचाइ अभिवृद्धिका लागि विशिष्ट योगदान पुर्याएबापत देशदेशान्तरका महानुभावलाई ‘नइ रजत महोत्सव पदक’ अर्पण गर्ने

असार १९, वीरगंज । विश्व हिन्दू परिषद् नेपाल, पर्सा निकट युवाहरुद्वारा पर्सा जिल्लाको वीरगञ्ज महानगरपालिकामा विरोध प्रदर्शन गरिएको छ ।

भारत सरकारको अनुदान सहयोग अन्तर्गत नेपालका विविध हितग्राही संस्थाहरुलाई ७५ वटा एम्बुलेन्स र १७ वटा विद्यालय बस उपहार प्रदान गरिएको

नेपालका लागि नवनियुक्त भारतीय राजदूत नवीन श्रीवास्तवले आज राष्ट्रपति भवन, शितल निवासमा आयोजित एक समारोहमा सम्माननीय राष्ट्रपति श्रीमती विद्यादेवी भण्डारी