मतगणनाको पहिलो दिन थियो । सबै मतपेटिका सभा गृहमा ल्याइ सकिएको थियो । र, मतगणनाका लागि नियम बनाउन तथा सबै ठिकठाक छ भन्ने सहमति गर्न बैठक बसियो । त्यो बैठकलाई भनियो, सर्वदलिय बैठक ।

तर, सो बैठकमा उपस्थित कुमार व्यञ्जनकारले सर्वदलिय शब्दसँग विमति राख्दै भनेछन्, “स्वतन्त्रहरु यो बैठकमा बस्न नपाउने हो कि नमिल्ने हो ? स्वतन्त्रको अस्तित्व नै नमान्ने गरि सर्वदलिय नभनौँ, सर्वपक्षिय भनौँ ।” लेखिसकेको सर्वदलिय काटेर सर्वपक्षिय बनाइएछ ।

समाजमा वास्तै नगरेका कुराहरुको पनि विशेष अर्थ हुन्छ । माथिको उदाहरण त्यसकै लागि हो । हामीले केहि उदाहरणहरु बनाइसकेका छौँ, बनाउँदैछौँ । अब बनाउनु पर्ने उदाहरणहरु छन् ।

पहिलो, विजय जुलुस वा विजय र्‍याली भन्न छोडौँ, धन्यवाद र्‍याली भनौँ । स्वतन्त्र हैसियतमा उठेको उम्मेदवार बालेनलाई भोट दिएर परिवर्तनका पक्षमा र बाटो छोड्दै गएका दलहरुलाई सबक सिकाउने उपायमा सहयोग गरेकोमा ‘धन्यवाद मतदाता’ भनौँ ।

जीतहारलाई मतगणना सकिएसँगै सकिदिउँ । घोषणापत्रमा भएका कुराहरु लागू गर्न सकेका दिन त्यो पनि मनाउँला तर अहिले विजय जुलुस भनेर अरुलाई पराजित भन्ने संकेत पनि नगरौँ । यसै पनि चुनावमा जित्नेले धेरै मत ल्याउने हो, बहुमत होइन । बालेन स्वयमको पनि बढिमा ३५ प्रतिशत मत आउला । यसको अर्थ हो, बदर मतहरु बाहेक बाँकी ५० प्रतिशत जति मतदाताहरुले अरुलाई छनौट गरेका थिए । आफुलाई मत हाल्ने ३५ प्रतिशतको शिर उँचो पार्दै गर्दा बाँकी ५० प्रतिशतको शिर निहुराउनु पर्ने काम नगरौँ, जिस्काएको जस्तो संकेत पनि नगरौँ । सबैले सँगै हिडेर मात्रै गन्तव्य सहजै पुगिन्छ ।

दोस्रो, ठाउँठाउँबाट र्‍यालीका लागि काठमाण्डौँ आउने कुराहरु एकदमै धेरै सुनिदैछ । काठमाण्डौँ आउनु भन्दा सोही क्षेत्रमा ‘धन्यवाद र्‍याली’ गर्ने हो भने त्यसले सो सो स्थानमा बढि प्रभाव छोड्छ । यहाँ पनि यस्तो किसिमको चेतना र अभिमत रहेछ भनेर प्रोत्साहन हुनेछ । यसैले स्थानीय एमआरआरियन (MRR Group)ले धन्यवाद र्‍यालीका लागि पहलकदमी लिदा राम्रो हुन्छ । धेरै कुरा चाहिने पनि होइन, नेपालको झन्डा र एमआरआरले काठमाण्डौँका मतदातालाई धन्यवाद भन्ने एउटा ब्यानर । आफ्नो क्षेत्रको ग्रुप च्याट बनाएर त्यो आयोजनाका लागि योजना सुरु गरे व्यवस्थित र भव्य हुने निश्चित छ । #RallyForBalen

नोटः सृजनात्मक विचार युवाहरुमाझ रुचाईएको विषय रहेकाले सामाजिक संजालबाट साभार गरी यहाँ सार्वजनिक गरिएको हो ।