फुटपाथ कब्जा गरी वर्कसप सञ्चालन गर्नेलाई महानगरले तिरायो ५ हजार जरिवाना

काठमाडौं– सडकपेटी नै कब्जा गरेर सञ्चालन गरिएका वर्कसपलाई काठमाडौं महानगरपालिकाले कारबाही गरेको छ।

बुधबार महानगरले बिजुली बजारको आर्क ब्रिजबाट देब्रेतर्फ रहेको ओम मोटरसाइकल वर्कसपलाई ५ हजार जरिवाना तिराएको छ।

सार्वजनिक सडकपेटी अतिक्रमण गरी उक्त वर्कसप सञ्चालन गर्दै फोहोर–मैलासमेत गरेको भन्दै महानगरले जरिवाना तिराएको हो।

सडकपेटी नै अतिक्रमण गरी २ सयभन्दा धेरै वर्कसपहरू सञ्चालनमा रहेको महानगरका प्रहरी प्रमुख राजु पाण्डेले बताए। नयाँ मापदण्ड बनाएर त्यस्ता वर्कसपहरूलाई कानुनी दायरामा ल्याउने तयारी भएको प्रहरी प्रमुख पाण्डेको भनाइ छ।

फुटपाथ ओगट्ने, कालो मोबिल फुटपाथमा फाल्ने, पानी बगाएर पैदल यात्रु र सवारीसाधनहरूलाई हिँड्न समस्या पार्ने त्यस्ता वर्कसपहरूलाई कारबाहीको दायरामा ल्याउने पाण्डेले बताएका छन्।