भारतको सहयोगमा सोलुखुम्बुमा ध्यान केन्द्र र गुम्बाको शिलान्यास

सोलुखुम्बु — नेपालका लागि भारतीय राजदूत नवीन श्रीवास्तवले सोलुखुम्बुमा ध्यान केन्द्र र गुम्बाको शिलान्यास गर्नुभएको छ। बुद्ध जयन्तीका अवसरमा राजदूत श्रीवास्तवले महाकुलुङ गाउँपालिका–१ बुङस्थित खिरौलामा ध्यान केन्द्र सहितको गुम्बा शिलान्यास गर्नुभएको हो ।

कार्यक्रममा राजदूत श्रीवास्तवले भारत सरकारले सगरमाथा क्षेत्रको खानेपानीदेखि शिक्षा र स्वास्थ्य क्षेत्रमा महत्त्वपूर्ण सहयोग रहदै आएको र आगमी दिनमा पनि नागरिकको मागका आधारमा सहयोग गर्दै जाने बताउनुभयो ।

‘गौतम बुद्ध नेपालमा जन्मिएर बुद्धत्व भारतमा प्राप्त गरेकोले दुई देशको सम्बन्ध विशिष्ट र ऐतिहासिक अनि पुरानो छ,’ राजदूत श्रीवास्तवले भने, ‘आगामी दिनमा सम्बन्ध थप मजबुत बनाउन हामी लागि पर्नेछौं ।’

हिमाली भेगका नागरिकको जीवनस्तर उकास्नका लागि शिक्षा, स्वास्थ्य र खानेपानीमा भारत सरकारले अरबौं लगानी गरेको भन्दै उनले शिलान्यन्स गरिएको ध्यान केन्द्र तथा गुम्बाको लागि ३ करोड ९५ लाख रकम सहयोगको घोषणा गर्नुभएको हो ।

४ करोड ५० लाखको लागतमा बन्ने उक्त गुम्बाको कुल लागतको ८० प्रतिशित भारत सरकार र २० प्रतिशत गाउँपालिकाले बेहोर्ने छ । सो अवसरमा गाउँपालिका अध्यक्ष सूर्यबहादुर कुलुङले भारतीय दूतावासले यसअघि पनि एम्बुलेन्स सहयोग गरेको भन्दै यस क्षेत्रको पर्यटन विकासमा पनि सहयोग गर्न आग्रह गर्नुभयो ।