क्यान्सर लागेका भित्ताहरु

कलाकारले भरिएको शहर जहाँ कलाकारिताको बेजोड उदाहरणहरु देख्न सकिन्छ । ति कलाकृतिहरु यति गम्भिर छन् कि जो कोहीले अनुमान समेत लगाउन सक्दैनन् ति रङ्गहरुको अर्थ । यस्ता अर्थ विहिन रङ्गहरु पोतिएका क्यानभासको ठुलो संख्या छ आजकल ।

हिजो मात्र त्यस्तै एउटा कलाकारिताले मेरो ध्यानकर्षण ग¥यो, निकै बेर उभिएर हेरिरहेको त्यो रङ्गको संयोजन रातो रङ्ग गाढा रातो । म त्यो कलाकारिताको अर्थ लगाउदै थिए, ती रङ्गहरु यसरी पोतिएको थियो कि त्यसको वास्तविक कुनै अर्थ थिएन । त्यसैवेला एकजना कलाकारले त्यही क्यानभासमा आफनो कलाकारिता मिसाइदिनुभयो अनि झन राम्रोसँग पोतिदिनुभयो ती भित्ताहरु । ति रङहरुको मिसाइरहदा उहाँले निकालेको आवाज निकै असभ्य थियो पिच्च ।

गुट्के कलाकारहरुले भरिएको मेरो शहर निकै रङ्गिएको छ । भित्ताहरुलाई क्यानभास सम्झेर मुखभरिको थुक लाई रङ ठानेर लियोनार्दौ दा भिन्ची ठान्नेहरुको संख्या दिन प्रति दिन बढिरहेको छ । मेरो शहरका भित्ताहरुलाई क्यानसर लागेको छ । गुटकाको प्याकेटमा ठुला ठुला अक्षरले लेखिएको सुर्तिजन्य पदार्थ स्वास्थ्यको लागि हानिकारक छ नपढेको झै । अनि त्यो क्यानसरले बिग्रिएको ओठको तस्बीरलाई देखेको नदेखेझै गर्नेहरु । आफनो स्वस्थ्यसँग खेलबाढ गरिरहँदा सगँसगै मेरो यो शुन्दर सहरलाई पनि अस्वस्थ बनाउन सक्रिय छन , अनि त्यो क्यानसर फैलिदै छ यहाँ भित्ताहरुमा, बाटोहरुमा, सार्वजनिक शौचालय, आकाशे पुल यत्रतत्र जहाँ जहाँ पाने, गुट्के कलाकारको आँखा पुग्छन ।

एउटा ठुलो साहितिक जथ्था पनि सक्रिय रुपमा लागिपरेको देखिन्छ मठ मन्दिर तथा विभिन्न पार्कको भित्तामा आफना कृतिहरु लेख्नलाई । मठ मन्दिरमा मायाका कसम लेख्ने, अश्लिलता फैलाउने कलाकार पनि निकै सक्रिय छन , सास्कृतिक सम्पदाको सुन्दरतामा हस ल्याउनलाई ।