मोदीसहित भाजपाका नेताले ट्वीटरमा नाम फेरे, नयाँ नाम ‘चौकीदार नरेन्द्र मोदी’

छिमेकी देश भारतमा लोकसभा निर्वाचन आउदै छ । चुनावको समयमा जनताको मन जित्न तरिकाहरु अपनाइन्छ । सन् २०१४ को आमनिर्वाचनमा चायवाला शब्दलाई प्रसिद्ध बनाएका भारतका प्रधानमन्त्री नरेन्द्र मोदीले आउन लागेको चुनावमा चौकीदार शब्द लोकप्रिय बनाउन खोजेका छन् । आमसभाहरूमा आफूलाई देशको चौकीदारका रूपमा चिनाउने मोदीले शनिवार ‘मैं भी चौकीदार’ शीर्षकमा एक भिडियो जारी गरेका थिए ।

आज चाहिँ उनले ट्विटरमा नाम परिवर्तन गरेर चौकीदार शब्द जोडेका छन् । उनकै सिको गर्दै भारतीय जनता पार्टीका ठूला नेताहरूले पनि आफ्नो नामका अगाडि चौकीदार शब्द जोडेका छन् । अध्यक्ष अमित शाह, रेलमन्त्री पीयूष गोयल लगायतले शब्द जोडेका हुन् । उता विपक्षी कांग्रेस पार्टीले चाहिँ ‘चौकीदार चोर है’ भन्ने नारा बनाएर मोदीलाई घेर्ने कोशिश गरिरहेको छ ।