सिमरा, बारा, चैत्र २८ ।  लाईभमाण्डूलाई सिमरा मालपोतका तात्कालिन कार्यालय प्रमुख मदन गुप्ताको अनियमितताका चाङसहितका प्राप्त केही प्रमाणहरु यहाँ प्रस्तुत गर्दैछौं ।

बारा जिल्लाको सिमरा मालपोतका तात्कालिन कार्यालय प्रमुख मदन गुप्ताले व्यापक अनियमितता गरी अरबौंको अकूत सम्पत्ति जोडेको भेटिएको छ । रौतहट स्थायी घर भएका मदन गुप्ताले झण्डै ८ वर्ष वीरगञ्ज मालपोतमा काम गरेपछि नायब सुब्बा पदमा सिमरा मालपोतमा पुगेका थिए । अख्तियारले छापा हान्ने सूचना पाएपछि यही २०७५, फागुन २८ गतेदेखि नै फरार रहेका गुप्ता भारतको बिहारस्थित सितामढीस्थित उनको ससुरालीमा लुकेर बसेको स्रोतले दाबी गरेको छ ।

सिमरा मालपोत कार्यालयका कर्मचारी, लेखापढी व्यवसायी र जग्गा दलालसंगको मिलोमतोमा गुप्ताले राज्यले प्राप्त गर्ने करोडौं रकम भ्रष्टाचार भईरहेको र मालपोत कार्यालय सिमरामा किर्ते कागजात बनाई जग्गा किनबेच भईरहेकोबारे व्यापक गुनासो आएछि अख्तियार दुरुपयोग अनुसन्धान आयोगको केन्द्रीय टोली बारा र पर्साका लागि खटिएको थियो । अख्तियारको टोलीले फागुन ३० गते सिमरा र लगत्तै पर्सास्थित वीरगञ्ज मालपोत कार्यालयमा छापामारी कार्यलयका सम्पूर्ण महत्वपूर्ण कागजातहरु आफ्नो नियन्त्रणमा लिएको थियो ।

लाईभमाण्डूलाई प्राप्त प्रमाणहरुमा गुप्ताले एउटै संकेत नम्बर राखी सेवाग्राहीलाई फरक-फरक मालपोत रसिद दिएका छन् । मालपोत कार्यालय पर्सा, वीरगञ्जमा रहँदा निजले जग्गा राजीनामा र बकसपत्र गरिएका छुट्टाछुट्टै रसिदमा एउटै संकेत नम्बर राखी राज्यले प्राप्त गर्नुपर्ने अरबौं रकम बराबरको राजस्व कुम्ल्याउन सफल भएका हुन् ।

फरक-फरक सेवाग्राहीहरुलाई दिइएको एउटै नम्बरको भुक्तानी रसिद तथा जग्गा रजिष्ट्रेशन तथा लालपूर्जाको प्रतिलिपीः



मालपोतकै कर्मचारीको मिलेमतोमा किर्ते कागजातमा कारोबारको जगजगी भएपछि जिल्ला प्रशासन कार्यालय बाराले नै अख्तियारको ढोका ढकढकाएको थियो । जिल्ला प्रशासन कार्यालय बाराले फागुन २२ गते हेटौंडास्थित आयोगको कार्यालयलाई पत्र लेखेपछि अख्तियारको टोली एक्सनमा आएको थियो ।

स्रोतका अनुसार गुप्ताले भूमाफियासँग मिली भ्रष्टाचार गर्न किर्ते नागरिकता समेत बनाउने गरेको समेत हुनसक्छ । उपसचिवको दरबन्दी रहने सिमरा मालपोत कार्यालयमा नियम बिपरित नायब सुब्बा पदका गुप्ताले राजनीतिक पहुँचका आधारमा कार्यालय प्रमुखको पद सम्हाल्दै आएका थिए ।

मालपोतमा काम गर्ने नायब सुब्बासरहको कर्मचारी रहेका गुप्ताले १ अर्ब ५० करोड रुपैयाँ बराबरको सम्पति जोडेको स्रोत बताउँछ । नायब सुब्बाको जागिरे गुप्ताले करिब १ करोड २५ लाख रुपैयाँ पर्ने बा ११ च ९६६० नम्बरको Ford Endeavor गाडी चढ्ने गरेका थिए । भू-माफियाहरुको समूह बनाई विभिन्न जग्गा खरिद तथा किर्ते गर्ने गरेका निज गुप्ताले जगत नारायण प्रसाद यादवको नाममा वीरगञ्ज महानगरपालिका-१६ मा १० करोड रुपैयाँभन्दा बढी मूल्यको १३ कित्ता जग्गा खरिद गरेको देखिएको छ ।

स्रोतका अनुसार गुप्ताले छोरा  र ज्वाँईको नाममा करोडौं अकूत सम्पति जोडेको, सुन्धारास्थित ७ तले लण्डन होटलमा लगानी गरेको, आफ्ना मतियार र सहयोगीहरुका नाममा वीरगञ्जका विभिन्न स्थानमा १६ कित्ता जग्गा र पक्की घरहरु जोडेको, मातपोत राजस्व अपचलन गरेको करोडौं रुपैयाँ रकम ब्याजमा लगाएका प्रमाणहरु भेटिएका छन् ।

निज जगत नारायण सहित मुकेश प्रसाद नाम गरेका र श्याम तिमल्सिनाले भ्रष्टाचार गरि गुप्ताले आर्जन गरेको अकुत धन बजारमा लगानी गर्ने गरेको प्रमाण समेत भेटिएको छ । मुकेश प्रसादले नै मदनको रकम लगानीका लागि सेटिङ मिलाउने गरेका थिए ।